«ՀԱՃԱԽԵՑԻ ՍԱՄԲՈՅԻ, ՔԱՆԻ ՈՐ ՀԱՅՐՍ ԽՍՀՄ ՓՈԽՉԵՄՊԻՈՆ Է ԵՂԵԼ». ՍԱՄԲՈՅԻ ԱՇԽԱՐՀԻ ԳԱՎԱԹԻ ԱՐԾԱԹԵ ՄԵԴԱԼԱԿԻՐ ԱՐԹՈՒՐ ՄԱՆՈՒԿՅԱՆ

Iravunk. com -ի մարզական թղթակիցը կապ է հաստատել ու բացառիկ զրույց ունեցել Երևանում կայացած սամբոյի Աշխարհի գավաթի խաղարկությունում արծաթե մեդալ նվաճած, երիտասարդների Աշխարհի փոխչեմպիոն, Եվրոպայի բրոնզե մեդալակիր ԱՐԹՈՒՐ ՄԱՆՈՒԿՅԱՆԻ հետ։

- Ողջույն, Արթուր։ Ինչպես կամփոփես Աշխարհի գավաթի խաղարկությունը։

- Հանդես եկա 64 կգ քաշային կարգում։ Առաջին գոտեմարտում հաղթեցի փախստականների դրոշի ներքո հանդես եկող արցախցի մրցակցիս, կիսաեզրափակչում էլ հաղթեցի Ուզբեկստանի ներկայացուցչին։ Եզրափակչում շատ մոտ էի ոսկե մեդալին, ափսոս 1։0 հաշվով պարտվեցի ազգությամբ ռուս մրցակցիս, ով աշխարհի չեմպիոնին հաղթելուց հետո ինձ հետ գոտեմարտեց։ Ամենադժվարը այս գոտեմարտը կարող եմ համարել, քանի որ մրցակիցս էլ շատ ուժեղ էր, իսկ ինձ խանգարեց գերհոգնածությունը։ Հաջորդ անգամ կաշխատեմ ավելի լավ հանդես գալ ու նվաճել ոսկե մեդալ, պիտի ջանք ու եռանդ չխնայեմ, որ հասնեմ նաև մեծահասակների Եվրոպայի ու Աշխարհի չեմպիոնների տիտղոսներին, ապա նաև Օլիմպիական ոսկե մեդալին։Շատ ուրախալի է, որ սամբո մարզաձևը ևս արդեն մտել է Օլիմպիական ընտանիք ու այս տարի պիտի լինի փորձնական, իսկ արդեն շատ մոտ ապագայում 2028 թվականին կլինի մշտական Օլիմպիական մարզաձև։ Սա շատ դրական ազդեցություն կունենա, շատ մեծ խթան կլինի, որ այս մարզաձևով էլ ավելի շատ պարապեն մարզիկները։ Չնայած, ասեմ, որ բավականին շատ են մեր երկրում ու աշխարհում սամբոյով հետաքրքրվողները, պարապողները։ 

-Արթուր, շատ հետաքրքիր է, թե որ տարիքից ես սկսել զբաղվել սպորտով, ինչպես արթնացավ սերը դեպի սպորտը քեզ մոտ, ումից ես ոգեշնչվել ։

-8 տարեկանից եմ սկսել պարապել, սկզբից ձյուդոյի պարապմունքների էի հաճախում, պատանեկան տարիներին նվաճումներ գրանցեցի։ Ապա, սկսեցի հաճախել արդեն սամբոյի, քանի որ հայրս Արմեն Մանուկյանը, սամբոյի ԽՍՀՄ փոխչեմպիոն է եղել, հենց նրանից էլ ոգեշնչվեցի ու սկսեցի պարապել այս մարզաձևով։

- Հայաստանում կարող ենք զարգացած համարել այս մարզաձևը։

- Իհարկե, միանշանակ, շատ զարգացած մարզաձև է մեր երկրում, օր - օրի է զարգանում։ Հենց դրա վառ ապացույցն այն է, որ մեր երկրում կայացան սամբոյի Աշխարհի գավաթի խաղարկությունը և անցած տարի սամբոյի Աշխարհի առաջնությունը։ Ամբողջ աշխարհից ուժեղագույն մարզիկներ գալիս են մեր երկիր ու մասնակցում, շատերը նույնիսկ չգիտեին մեր երկրի տեղը, ու սա շատ լավ հնարավորություն էր ծանոթանալու մեր երկրի, մեր սպորտի, մշակույթի հետ ։Շատերը մրցաշարին մասնակցելուց հետո, շուտ չեն հեռանում մեր երկրից, այլ մնում են ահագին ժամանակ, որպեսզի ծանոթանան մեր երկրի տեսարժան վայրերի հետ, ինչը, բնական է, շատ ուրախալի փաստ է, այսպիսով տուրիզմը ևս կզարգանա մեր երկրում։ Իսկ պատանիներին խորհուրդ կտամ չհանձնվել երբեք, պայքարել մինչև վերջ, իրենց նպատակներին հասնելու համար։ Հեռախոսային վնասակար խաղերից էլ հեռու մնան ու սպորտին ավելի մեծ ուշադրություն դարձնեն, սկզբից, ցավոք, չեն գիտակցում, բայց հետագայում կարող են բախվել հոգեբանական շատ ծանր հետևանքների, դրա համար ավելի լավ կլինի սպորտով զբաղվել։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ