ՀԱՅ ՖՈՒՏԲՈԼԻՍՏՆԵՐԸ ՏՐԱՆՍՖԵՐԱՅԻՆ ԱՆՑՈՒԴԱՐՁՈՒՄ
Արխիվ 16-20![ՀԱՅ ՖՈՒՏԲՈԼԻՍՏՆԵՐԸ ՏՐԱՆՍՖԵՐԱՅԻՆ ԱՆՑՈՒԴԱՐՁՈՒՄ](/timthumb.php?src=disc/old16-20/87643.png&w=780)
Ֆուտբոլային ամառը խոստանում է բավականին թեժ լինել: Այս շրջանում էլ արդեն ընտրանու խաղացողներից շատերը փոխել են ակումբները կամ ազատ գործակալի կարգավիճակում են:
Կիպրական մի քանի լրատվամիջոցներ տեղեկատվություն են տարածել, որ Լիմասոլի ԱԷԼ-ը բանակցություններ է վարում Գեւորգ Ղազարյանի հետ: Մինչ այդ, տեղեկատվություն կար նաեւ, որ Ղազարյանի ծառայություններով հետաքրքրված են ղազախական ակումբներ: Իսկ Բուլղարիա հնարավոր տեղափոխության մասին լուրերը ֆուտբոլիստը ժխտել էր: ԱԷԼ-ը լավ տարբերակ կարող է լինել Ղազարյանի համար, խաղաժամանակ ստանալու եւ մարզավիճակը պահելու համար, բացի այդ, Եվրոպայի առաջնությունում հանդես գալու հեռանկարը եւս կարեւոր հանգամանք է: «Կայսարի» եւ Հայաստանի հավաքականի հարձակողական ոճի կիսապաշտպան Տիգրան Բարսեղյանը կարող է կարիերան շարունակել ղազախական մեկ այլ ակումբում՝ «Աստանայում»: Իհարկե, ղազախական ակումբից տեղափոխվել այլ առաջնության ակումբ շատ ավելի դրական դինամիկա կլիներ հայ ֆուտբոլիստի կարիերայում, բայց այս պահի առաջարկները ավելին թույլ չեն տալիս: Իսկ Աղվան Պապիկյանն իր ելույթները կշարունակի լեհական «Հոյնիչանկա» ակումբում. 25-ամյա ֆուտբոլիստը կնքել է 1 տարվա պայմանագիր: Հայաստանի հավաքականի կիսապաշտպան Ռումյան Հովսեփյանն էլ հեռացավ Հայաստանի փոխչեմպիոն Երեւանի «Փյունիկից» եւ կարիերան կշարունակի արտերկրում: 27-ամյա ֆուտբոլիստի պայմանագիրն ավարտվել է: Դե իսկ այս պահի հայկական ֆուտբոլի գլխավոր ինտրիգը վերաբերում է Հենրիխ Մխիթարյանին, եւ թե արդյոք հայ ֆուտբոլիստը կլքի՞ Լոնդոնի «Արսենալը»: Այն, որ Ունայի Էմերին պետք է ամեն գնով այս մրցաշրջանում տիտղոսներ նվաճի, թույլ է տալիս ենթադրել, որ իսպանացին կփորձի հնարավորինս նոր կադրեր ձեռք բերել թիմի համար: Մխիթարյանը հնարավոր է, որ չհեռանա ակումբից, բայց արդյո՞ք Էմերին կդիտարկի նրան որպես թիմի առանցքային ֆուտբոլիստ ու կփորձի նրա եւ մի քանի այլ ֆուտբոլիստների շուրջ կառուցել խաղը, մեծ հարցական է: Չի բացառվում, որ Մխիթարյանին բաժին հասնի հանդիպումների վերջնամասում խաղադաշտ դուրս եկող ֆուտբոլիստի «պաշտոնը»: «The Times»-ը հայտնում է, որ «Արսենալը» ամռանը ցանկանում է ամեն կերպ ձեռք բերել «Քրիստալ Փելասի» կիսապաշտպան Ուիլֆրիդ Զահային, որի համար ակումբը կարող է հրաժարվել Մխիթարյանի ծառայություններից: Ուիլֆրիդ Զահայի տրանսֆերը կարժենա նվազագույնը 55 մլն ֆունտ, մինչդեռ «Արսենալը» չունի մեծ բյուջե այս ամառային տրանսֆերային պատուհանի համար, ու ստիպված է վաճառել ֆուտբոլիստների: Մխիթարյանը այս ցանկում առաջիններից է, հաշվի առնելով նրա բարձր տրանսֆերային արժեքը: Հենրիխ Մխիթարյանի պայմանագիրը «Արսենալի» հետ նախատեսված է մինչեւ 2021թ. ամառ:
ՔՐԻՍՏԻՆԵ ՊԵՏՐՈՍՅԱՆ