Առանց համապատասխան կրթության՝ երգում են, ինքնահռչակվում երգիչ. Անի Ամիրյան

«Իրավունք»-ի զրուցակիցը երգչուհի ԱՆԻ ԱՄԻՐՅԱՆԸ, ով, ցավոք, դուրս է եկել երգի ասպարեզից, բայց շարունակում է երգել այլեւս միայն իր ու իր հետեւորդների համար եւ այդ կատարումները երբեմն տեղադրում իր սոցցանցային էջում:

— Անի, սովերել, այնուհետ աշխատել եք Երգի պետական թատրոնում: Այն ի՞նչ տվեց Ձեզ:

— Սովորել եւ դասավանդել եմ ոչ միայն Երգի թատրոնում: Իմ հիմնական աշխատանքը եղել է ՀՀ մանկավարժական համալսարանի՝ Կուլտուրայի ֆակուլտետի ռեժիսուրայի բաժնում՝ որպես դերասանի վարպետության դասախոս: 2006-ից մինչեւ 2021թվականը համատեղությամբ դասավանդել եմ նաեւ Երգի թատրոնում: Ինչ խոսք, հրաշալի տարիներ էին:

— Ինչո՞ւ հրաժարվեցիք երգելուց:

— Ժամանակ կար, երբ համերգներն ու բեմից երգելու առիթները շատ էին, տարիների հետ այդ բեմը փոխարինվեց ռեստորանի բեմով ու ես, պարզապես, չցանկացա երգել ռեստորանում: Թեեւ ոչ մի վատ բան չեմ տեսնում ռեստորանում երգելու մեջ, բայց ես այդպես չէի պատկերացնում երգարվեստը: Հիմա կրկին երգում եմ, բայց ոչ բեմից: Տանը՝ համեղ բաներ պատրաստելիս, ես միշտ եմ երգում…

— Չե՞ք կարոտում Երգի պետական թատրոնը:

— Առհասարակ կարոտում եմ այն տարիները, երբ երգում էի, դասավանդում, ունեի շատ ուսանողներ, ստեղծագործական բուռն եռուզեռի մեջ էի, բայց հիմա ավելի հանգիստ ու երջանիկ եմ:

— Ըստ Ձեզ` հասարակությունը՝ հիմնակականում երիտասարդությունը, ինչպիսի՞ երաժշտություն է նախընտրում այսօր:

— Կդժվարանամ պատասխանել, երեւի ավելի շատ թեթեւ, կարճ տեւողությամբ երգերն են հիմա ակտուալ:

— Երգիչների պակաս չունենք, սակայն որակը բավականին կաղում է: Ինչո՞ւ…

— Կաղում է, քանի որ կրթությունն այլեւս կարեւոր չեն համարում: Առանց համապատասխան կրթության՝ երգում են, ինքնահռչակվում՝ երգիչ կամ երգչուհի:

— Ձեր դուստրը կզբաղվի՞ երգով, թե՞ կնախընտրի այլ ոլորտ:

— Իմ դուստրն արվեստ շատ սիրում է, բայց չեմ կարծում, որ երբեւէ ցանկություն հայտնի երգել, քանի որ չեմ նկատել հատուկ սեր երգարվեստի նկատմամբ, ավելի շատ ճշգրիտ գիտություններ է սիրում: Իր սիրելի առարկան մաթեմատիկան է:

— Երգչուհուց՝ դիմահարդար անցումն ինչո՞վ էր պայմանավորված:

— Երգչուհուց կոսմետոլոգիա անցումը և՛ պատահական էր, ե՛ւ ոչ պատահական: Հավանաբար, ի վերուստ, առհասարակ կյանքը փոխելու միտում ուներ, մասնագիտություն փոխելու հետ մեկտեղ փոխվեց ամբողջ կյանքս: Ես պարզապես սովորեցի մի արդի մասնագիտություն այն պատճառով, որ եթե հայտնվեմ ինչ-ինչ պատճառներով երկրի սահմաններից դուրս, ունենամ մի մասնագիտություն, որն ինձ գումար կբերի: Այդ մտքով գնացի սովորեցի, ու դա դարձավ իմ մշտական մասնագիտությունը:

— Եթե ժամանակը հետ տալու հնարավորություն ունենայիք, ի՞նչ կփոխեիք կամ՝ արդյոք կփոխեիք:

— Ոչինչ չէի փոխի, ոչ մի դետալ: Ու գիտակցում եմ, որ եթե որեւէ բան փոխել կարողանայի, չէի լինի այնպիսին, ինչպիսին կամ: Իմ կյանքի թե՛ դժվարությունները եւ թե՛ երջանիկ պահերն են ինձ թրծել, կերտել, դարձրել այնպիսին, ինչպիսին հիմա կամ: Հետեւաբար, գնահատում, սիրում եւ վայելում եմ կյանքիս ամեն րոպեն եւ շնորհակալ եմ ամեն ինչի համար:

— Մեր ընթերցողներին, որպես երգիչ եւ դասախոս, ինչպիսի՞ խորհուրդ կտաք:

— Խորհուրդ չեմ սիրում տալ, կցանկանամ խնդրել, որ միշտ սովորեն: Կյանքը հավերժ դպրոց է, սովորում, քննություն ենք հանձնում, տեղափոխվում կամ մնում ենք նույն դասարանում, բայց, ի վերջո, սովորում ու տեղափոխվում ենք մի դասարան բարձր: Այնպես, որ սովորել, սովորել եւ կրկին սովորել:

— Ի՞նչ է կատարվում հիմա մեր մշակույթի հետ՝ Ձեր գնահատմամբ:

— Մեր մշակույթը դարեր ի վեր եղել է եւ մնում է օրինակելի ամբողջ աշխարհի համար, պարզապես հիմա ժամանակակից աշխարհն իր հետ բերել է էլեմենտներ, որոնք մեզ օտար են ու ոչ հաճելի ականջի ու աչքի համար, հատկապես երաժշտական աշխարհում: Սակայն ամեն ինչ էլ ֆիլտրվում եւ մաղվում է ժամանակի հետ, ու տակը մնում է այն իսկականը, մաքուրը, որը կերտել ենք դարերով: Ես անուղղելի լավատես եմ: Ամեն ինչ հրաշալի է լինելու:

— Երբեւէ կվերադառնա՞ք բեմ:

— Ամենահաճախ ինձ տրվող հարցերից է, որից ենթադրում եմ, որ ցանկություն կա ինձ լսելու եւ տեսնելու: Կասեմ միայն հետեւյալը՝ երբեք մի ասա՝ երբեք: Մի օր գուցե, ոչինչ չեմ բացառում: Կարեւորը՝ ցանկությունս մեծ է:

ՆԱՆԱ ՍԱՐԳՍՅԱՆ

Այս թեմայով Թատերական անցուդարձ. ինչ դիտել այս շաբաթ «Համլետ»-ի ամեն մի նախադասությունը, կարծես, հենց այսօրվա մասին է. առաջնախաղ՝ Դրամատիկական թատրոնում Այսօր երգչուհի Վարդուհի Վարդանյանի ծննդյան օրն է Ինչ է սպասվում հուլիսին՝ Պարոնյանի անվան երաժշտական կոմեդիայի պետական թատրոնում Երգչուհի Էնջլը պատրաստվում է կազմակերպել հայտնի տատիկի ցուցահանդեսը. ով է նա