Բոլոր շարժերի եւ «մանյովրների» գնահատականը տրվելու է. Վահան Բաբայան

Ըստ Ռեֆորմիստների կուսակցության նախագահ ՎԱՀԱՆ ԲԱԲԱՅԱՆԻ, ինչ կատարվում է, ինչ ելույթներ լսում ենք Նիկոլ Փաշինյանի կողմից, նորություն չէ: Այս մասին նա նշեց «Իրավունք»-ի հետ զրույցում:

- Պարոն Բաբայան, Նիկոլ Փաշինյանն ԱԺ ամբիոնից ուղիղ հայտարարում է, թե դուրս կգանք ՀԱՊԿ-ից, իսկ ՀԱՊԿ անդամ Բելառուսի հետ, կարծես թե, ընդհանրապես հարաբերությունները սառեցվում են: Ի՞նչ կասեք այս մասին:

- Սա տարիների ընթացքում կուտակված քաղաքական խոսույթ է եւ հայտարարություններ են, որոնք, իհարկե, պետք էր սպասելի լիներ ե՛ւ ընդդիմության, ե՛ւ քաղաքական բոլոր շրջանակների համար, հետեւապես՝ նորություն չէ: ՀԱՊԿ-ից դուրս գալու մասին հաթաթաները լսում ենք երկար ժամանակ, այնպես որ, նոր բան չենք լսել, ինչին պետք է հատուկ անդրադարձ լինի:

- Ամեն դեպքում, նորությունն այն էր, որ ընդդիմությունը ո՛չ Բագրատ սրբազանի շարժման հարթակից, ո՛չ այլ բարձր ամբիոնից չհստակեցրեց՝ իսկ իրենք այդ դիրքորոշմանը՝ դե՞մ են, կո՞ղմ են, թե՞ չեզոք են վերաբերում:

- Ընդդիմություն ասվածը շատ տարբեր է եւ տարբեր հատվածներ է իրենից ներկայացնում: Ես չեմ կարող ընդդիմության անունից խոսել, բայց մեր կուսակցության անունից կարող եմ ասել, որ մենք առաջիկայում կտանք քաղաքական գնահատական՝ ներքին եւ արտաքին հարցերի վերաբերյալ մեր համագումարում, որն անցկացվելու է հուլիսի սկզբին: Նախապատրաստում ենք քաղաքական հայտարարություն, նաեւ բոլոր շարժերի ու «մանյովրների» գնահատականները տրվելու են հենց համագումարին:

- Ինչպե՞ս եք տեսնում Բագրատ սրբազանի շարժման ելքը, ի վերջո, այն ձախողվե՞ց, թե՞ մարտավարական սխալներ թույլ տվեց, որը դեռ հնարավոր է շտկել:

- Եկեք չպատասխանեմ ձեր հարցին: Շարժման վերաբերյալ բացարձակապես ցանկություն չունեմ որեւէ գնահատականներ տալու: Բայց մեր կուսակցության համագումարի օրը մեր կարծիքը կհայտնենք՝ ընդհանուր գործող իրադարձությունների վերաբերյալ:

- Խորհրդարանական ընդդիմության մանդատները պահելը որեւէ խնդիր լուծո՞ւմ է կամ կարո՞ղ է դեռեւս լուծել:

- Բացարձակապես, խորհրդարանական ընդդիմության մանդատները պահելն ինչպես 2022 թվականին, առավել եւս այսօր, հարց չի լուծում: Այդտեղ շատ նրբություններ կան, որ պետք է արձանագրենք, այդ թվում՝ ամենակարեւորը, որ այդ մանդատներով օժտված մարդկանց օգտակարությունը, այսպես ասած, ընդհանուր պայքարի գործում, որեւէ նշանակություն չունեցավ՝ նույնիսկ ունենալով փողոցում տասնյակ հազարավոր մարդկանց առկայություն, որն, ի դեպ, առաջին անգամ չէր, նման դեպք էլի եղավ 2022 թվականին: Այսինքն՝ հիմա մի իրավիճակ է, որ ո՛չ պահելն է մի բան այդ մանդատները, ո՛չ էլ վայր դնելը:

- Այդուհանդերձ, մայիսի 9-ից մինչեւ հունիսի 9-ը շատերը լիահույս էին, որ խորհրդարանական ընդդիմությունը Նիկոլ Փաշինյանին անվստահություն հայտնելու գործընթաց է սկսելու եւ հնարավոր է այդ ճանապարհով նրան հեռացնել…

- Մարդիկ շատ բանի հույս ունեն, բայց ես էլի եմ ասում՝ մեր համագումարում կտանք բոլոր գնահատականները:

ՀՐԱՆՏ ՍԱՐԱՖՅԱՆ

Այս թեմայով «Не смешите мои тапочки». Շարժումը մարեց այն ժամանակ, երբ հայտարարվեց, որ Փաշինյանին տրվում է մեկ ժամ ժամանակ հեռանալու համար. Բաբայան Ե՛վ Արթուր Վարդանյանի, ե՛ւ Վահագն Չախալյանի դեպքում իրականացվում է շատ կարծր քաղաքական հետապնդում. Բաբուխանյան Արթուր Վարդանյանի ազատազրկումը քաղաքական հետապնդում է. ՀՃԿ նախագահ ՔՊ-ականներին ավելի շատ անհանգստացրել է շեֆի անսովոր ուրախ տրամադրությունը. ԲԱՄԲԱՍԱՆՔ Արցախի նախագահի մեքենան քրեական վարույթի շրջանակում ենք առգրավել, մնացածը նախաքննական գաղտնիք է (տեսանյութ)