Հունիսի 12-ը Թալին համայնքի համար նշանավորվեց նոր ձեռքբերումներով, համայնքի տարբեր անկյուններում բացվեցին պուրակներ և մարզական գոտիներ
Հասարակություն![Հունիսի 12-ը Թալին համայնքի համար նշանավորվեց նոր ձեռքբերումներով, համայնքի տարբեր անկյուններում բացվեցին պուրակներ և մարզական գոտիներ](/timthumb.php?src=disc/12-06-24/459554d5653930c53c706cb08877dc8b.jpg&w=780)
Հունիսի 12-ը Թալին համայնքի համար նշանավորվեց նոր ձեռքբերումներով, համայնքի տարբեր անկյուններում բացվեցին պուրակներ և մարզական գոտիներ․
__________________
Համայնքում մեր քաղաքացիների առօրյան ավելի հագեցած, հարմարավետ ու բազմաբովանդակ դարձնելը՝ մեկտեղելով հանգիստն ու ժամանցը, Թալինի համայնքապետարանի առաջնային նպատակներից ու աշխատանքային ուղվածություններից մեկն է, ուստի արվում է հնարավոր ամեն բան դրա ապահովման համար։
Համայնքապետարանն այս առումով չի սահմանափակվում միայն սեփական հնարավորություններով, այլ նաև համագործակցում է բարերարների հետ, նրանց ուշադրությունը հրավիրելով Թալին համայնքի վրա՝ այդպիսով օգուտ բերելով համայնքին։
Բարերար Տիգրան Սաֆարյանը ԱՄՆ-ում ապրող այն հայերից է, ով չնայած հազարավոր կիլոմետրերի, շատ մոտ է գտնվում սեփական հայրենիքին և համայնքին՝ հնարավոր ամեն տարբերակով աջակցելով ու հայրենիքի զարգացմանն իր ուրույն դերն ունենալով։
Թալին համայնքի պատվավոր քաղաքացի՝ բարերար Տիգրան Սաֆարյանի և Էռնա Սաֆարյանի հովանավորությամբ ու Թալինի համայնքապետարանի հետ համագործակցության արդյունքում, Թալին քաղաքի Խանջյան 13/1 հասցեում գտնվող քաղաքային զբոսայգին վերակառուցվել է և այսօր հանդիսավոր կերպով իր դռները բացեց բնակիչների համար։ Զբոսայգին կահավորված է հետաքրքիր ու լավ ժամանցի ապահովման, մարզվելու և զբոսնելուն համապատասխան։
Կաթնաղբյուր բնակավայրում կառուցման ավարտական փուլում է մարզական գոտին՝ բարերարներ Մարատ և Դարյա Բաբախանյանների ընտանիքի հովանավորությամբ: Դպրոցին հարակից մարզական գոտին հնարավորություն կտա բնակավայրի երեխաներին և պատանիներին իրենց հանգիստն ու ժամանցն անցկացնել բարեկարգ ու հարմարավետ միջավայրում։
Բարերարների ուշադրության կենտրոնից անմասն չի մնացել նաև Զարինջա բնակավայրը, որտեղ բարերարներ Հարութ և Ասյա Կուլյանների ընտանիքի կողմից նույնպես կառուցվել է մարզական գոտի։ Այսօր բարերարների ձեռքով կտրվեց կարմիր թելն ու երեխաները մուտք գործեցին զբոսայգի, որտեղ սիրով կանցկացնեն իրենց ժամանցը։
Թալին քաղաքի մեկ այլ հատվածում՝ Շահումյան 4-Տերյան 24 հասցեների տարածքում այսօր ևս տեղի ունեցավ այգու բացում, այս հատվածի բազմաբնակարան շենքերի բնակիչները, մասնավորապես երեխաներն այսուհետ կմարզվեն, երեկոներն ու ազատ ժամանակը կանցկացնեն հագեցած ու ժամանակակից ստանդարտներին համապատասխան բակում։ Այս մարզական գոտին կառուցվել է բարերարներ Էդուարդ Ակոպյանի, Սերգեյ Սաֆարյանի ու նրանց ընտանիքների կողմից:
Մեր համայնքի բարերարներին հանձնեցի շնորհակալագրեր՝ համայնքի զարգացմանն իրենց ունեցած ներդրման համար։
Բացման արարողություններին ներկա էին բարերարները, Թալինի համայնքապետարանի և ՀՈԱԿ-ների աշխատակիցներ, վարչական ղեկավարներ, համայնքի բնակիչներ, հյուրեր։
Օրվա ընթացքում այցելեցինք նաև Թալինի Սուրբ Աստվածածին եկեղեցի։ Եկեղեցու այս տարվա խաչի քավորը բարերար Տիգրան Սաֆարյանն է, ով այս ամիսների ընթացքում մեծաքանակ աջակցություն է հատկացրել Թալինի Սուրբ Աստվածածին եկեղեցուն՝ կրկնապատկելով դրա հմայքն ու գեղեցկությունը։
Շնորհակալություն եմ հայտնում մեր բոլոր բարերարներին՝ Թալին համայնքի կողքին լինելու, մեր բնակիչների բարօրության համար իրենց ներդրումն ունենալու և համայնքի հետ համագործակցությանը պատրաստակամ լինելու համար։