Իրո՞ք, այս մարդիկ կարծում են, որ մենք հիշողություններս կորցրել ենք. Զարմանք
Ներքաղաքական![Իրո՞ք, այս մարդիկ կարծում են, որ մենք հիշողություններս կորցրել ենք. Զարմանք](/timthumb.php?src=disc/12-06-24/cfcda1dc1b82255c0bcfee64ca38fb60.jpg&w=780)
Այն, որ նախկին նիկոլական չի լինում, իր գրառմամբ եւս մեկ անգամ ապացուցել է Նիկոլ Փաշինյանի խմբակցության նախկին պատգամավոր ՍՈՖՅԱ ՀՈՎՍԵՓՅԱՆԸ: Նա վերջին վեց տարվա մեր երկրին պատուհասած դարդերը թողած՝ իր անորոշ զարմանքն է արտահայտել, թե ինչու է ՀՀ 3-րդ նախագահ Սերժ Սարգսյանը դատարանում արդարացվել: «Ոչ վաղ անցյալում նախկիններին մեղադրողների առաջին շարքերում դուք եւս կանգնած էիք, տիկին Հովսեփյան, ու էլի նույն անհիմն սցենարն էր։ Այդ սցենարում նաեւ Արցախի հանձնում էր, բանակի իրական թալանն ու կազմաքանդումն էր, ու այդ սցենարով էր, որ դուք այդ ժամանակ ՀՀ ԱԺ պատգամավոր էիք։ Որոշ ժամանակ անց այդ ուղուց, կարծես թե, հետ կանգնեցիք, բայց այսօր ձեր անորոշությունը կասկածների տեղիք է տալիս։ Դուք շատ լավ հասկանալով, որ զոհ եք դարձել ստին ու կեղծիքին, այսօր հասկանալով նաեւ, որ ՀՀ 3-րդ նախագահ Սերժ Սարգսյանի վրա բացի բենզինի անհիմն գործից ուրիշ ոչինչ չէին էլ կարող կարել, չե՞ք հասկացել, որ Ս. Սարգսյանն իր հայրենիքի սահմաններն անառիկ պահող, մարտունակ բանակ ստեղծող ու հզորացնող ղեկավար է եղել, որ նրա ղեկավարման տարիներին բոլոր ոլորտները ոչ թե ձախողել էին, այլ հակառակը՝ վերելք էին ապրում, որ ամոթ էր պարզապես նման մարդու անվան հետ խաղալը, Արցախի հերոսին «նախկին» անվանելը, որը, ցավոք, այսօր եւս օգտագործել եք ձեր գրառման մեջ, իսկ այդ քրգործը, իհարկե, պետք է փակվեր», - անդրադառնալով Ս. Հովսեփյանին՝ գրել է ՀՀԿ ԵԿ Հասարակայնության հետ կապերի եւ լրատվության հարցերով հանձնաժողովի ղեկավար Անի Համբարձումյանը եւ շեշտել, որ հայրենիքի գողը, երկիրը թալանողը եղել են նախկին ու ներկա ՔՊ-ականները: Հետաքրքիր է՝ Սոֆյա Հովսեփյանը մի՞թե համամիտ չէ այս մտքի հետ:
Չէ, իսկապես, նախկին նիկոլական չի լինում. այս համոզման ես գալիս, երբ հետեւում ես նախկին ԼՀԿ-ական պատգամավոր ԱՆԻ ՍԱՄՍՈՆՅԱՆԻ մտքերին: Նիկոլի հետ դաշինք կազմած քաղաքական ուժի անդամը, ում կուսակցության նախագահ Էդմոն Մարուքյանը մինչեւ վերջերս Փաշինյանի հատուկ հանձնարարություններով դեսպանն էր, հայտարարել է, թե՝ «Ռոբերտ Քոչարյանը եւ Սերժ Սարգսյանը Նիկոլ Փաշինյանին ստեղծել, բերել են իշխանության եւ մինչեւ վերջ պաշտպանելու են նրան` քաղաքական դաշտում բոլորին փչացնելով եւ խանգարելով»: Ի՞նչ երես պետք է ունենա մարդ, որ վեց տարի նույնացվի Նիկոլի իշխանության հետ ու հիմա հանկարծ իրեն նետի Բագրատ սրբազանի շարժման գիրկը եւ մի հատ էլ ինքն իրեն մոռացած՝ ասի, թե Քոչարյանն ու Սարգսյանն են Նիկոլին բերել իշխանության: Իրո՞ք, այս մարդիկ կարծում են, որ մենք հիշողություններս կորցրել ենք:
Ուշագրավ հայտարարությամբ է հանդես եկել ամերիկացի նախկին հետախույզ ՍՔՈԹ ՌԻԹԵՐԸ: Իր X-միկրոբլոգում նա գրել է, որ ԱՄՆ իշխանություններն արգելել են իրեն՝ մասնակցել Սանկտ Պետերբուրգի միջազգային տնտեսական ֆորում 2024-ին։ «Ես Նյու Յորքից ինքնաթիռ էի նստում։ Մաքսայինի երեք աշխատակից ինձ մի կողմ տարան, անձնագիրս վերցրին։ Հարցին, թե ինչու, նրանք պատասխանեցին. «Պետդեպարտամենտի հրամանն է»: Նրանք ինձ համար այլ տեղեկություն չունեին։ Օդանավից հանեցին իմ պայուսակները, իսկ հետո ինձ դուրս հանեցին օդանավակայանից։ Իմ անձնագիրն են պահել», - պատմում է նա ու արձանագրում. «Եվ այս ամենը կատարվում է ոչ թե Հյուսիսային Կորեայում, այլ՝ ուշադրությո՜ւն, դեմոկրատական ու խոսքի ազատության երկրում՝ Ամերիկայում»: Իսկ մեզ մնում է զարմանալ նախկին հետախույզի վրա, որ դեռ զարմանում է՝ փնտրելով ու չգտնելով ժողովրդավարություն Միացյալ Նահանգներում: Չէ՞ որ այն իրականում երբեւէ չի էլ եղել այնտեղ:
Զարմացած է «Իրավունք»-ը