ԱՅՍՕՐ ԳՅՈՒՄՐԵՑԻ ԱՆՎԱՆԻ ԾԱՆՐԱՄԱՐՏԻԿ, ԱՇԽԱՐՀԻ ԵՌԱԿԻ ՉԵՄՊԻՈՆ ԳԱՐԻԿ ԿԱՐԱՊԵՏՅԱՆԻ ԾՆՆԴՅԱՆ ՕՐՆ Է

Այսօր, հունիսի 11-ը, անվանի ծանրամարտիկ, Երիտասարդների Եվրոպայի կրկնակի չեմպիոն, Աշխարհի եռակի չեմպիոն, Աշխարհի գավաթի արծաթե մեդալակիր, ծնունդով գյումրեցի ԳԱՐԻԿ ԱԼԵՔՍԱՆԻ ԿԱՐԱՊԵՏՅԱՆԻ ծննդյան օրն է, 21-ամյակն է նշում։ Նա ծնվել է 2003 թվականին։ Գյումրիի Օլիմպիական հերթափոխի պետական մարզական քոլեջի սան է։ Գարիկի անձնական մարզիչը հայրն է վաստակավոր մարզիչ Ալեքսան Կարապետյանը։ Գարիկը, հենց հայրիկից էլ ոգևորվել է ու պարապել ծանրամարտով, հասել բազում հաջողությունների։ 2022֊ի մայիսի 2֊ին Հունաստանի Հերակլիոն քաղաքում 96 կգ քաշայինների պայքարում, Կարապետյանը երկամարտի 370 կգ արդյունքով (170+200),երկրորդ տարին անընդմեջ հռչակվեց երիտասարդների Աշխարհի չեմպիոն։ 2021֊ին Ուզբեկստանում էր դարձել Աշխարհի առաջնության չեմպիոն, 2023֊ին դարձավ արդեն Աշխարհի եռակի չեմպիոն։ Գարիկը շատ աշխատասեր, նպատակասլաց, շատ բարի, հիանալի անձնավորություն է։ Անցած տարի Եվրոպայի չեմպիոնի տիտղոսը նվաճեց ու սահմանեց Աշխարհի ռեկորդ, այս տարի էլ դարձավ Աշխարհի գավաթի խաղարկության արծաթե մեդալակիր։ Նա այս տարի կմասնակցի նաև Փարիզում կայանալիք Օլիմպիական խաղերին։

Iravunk. com - ի մարզական թղթակիցը, կապ է հաստատել ու կարճ զրույց ունեցել օրվա հոբելյարի հետ։

- Շնորհավորում ենք, Գարիկ ծննդյան տարեդարձի առթիվ, մաղթում նորանոր հաղթանակներ արդեն Փարիզում։

- Շատ շնորհակալ եմ։ Կուզենամ, որ ամենակարևորը մեր երկրում միշտ խաղաղություն լինի։ Ես այժմ գտնվում եմ Ծաղկաձորում։ Գյումրիում հավաքներին մասնակցելուց հետո, այժմ եկել ենք Ծաղկաձոր, այստեղ պատրաստվում ենք Փարիզում կայանալիք Օլիմպիական խաղերին, ջանք ու եռանդ չեմ խնայում,որպեսզի կարողանամ հաջող հանդես գալ ու նվաճել ամենաբաղձալին Օլիմպիական ոսկե մեդալը, դա յուրաքանչյուր մարզիկի երազանքն է։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ