«ԿԱՇԽԱՏԵՄ ԼԱՎ ՊԱՐԱՊԵԼ, ՈՐՊԵՍԶԻ ՀԵՏԱԳԱ ՄՐՑԱՇԱՐԵՐՈՒՄ ՈՍԿԵ ՄԵԴԱԼԻՆ ՀԱՍՆԵՄ». ԲՌՆՑՔԱՄԱՐՏԻ ԵՐԻՏԱՍԱՐԴՆԵՐԻ ԵՎՐՈՊԱՅԻ ՓՈԽՉԵՄՊԻՈՆ ՄԻՍԱԿ ՏԵՓԱՆՅԱՆ

Iravunk. com - ի մարզական թղթակիցը, բացառիկ զրույց է ունեցել Խորվաթիայի Պորոշ քաղաքում կայացած Բռնցքամարտի երիտասարդների Եվրոպայի առաջնությունում արծաթե մեդալ նվաճած, փոխչեմպիոնի տիտղոսին արժանացած, կաշվե ձեռնոցի մարտիկ, ծնունդով Շիրակի մարզի Ախուրյան խոշորացված համայնքի Կառնուտ գյուղից ՄԻՍԱԿ ՏԵՓԱՆՅԱՆԻ հետ։ Նա այսպես մեկնաբանեց իր նվաճումը.

- Հանդես եկա գերծանր +92 կգ քաշային կարգում։ Ընդհանուր երեք մենամարտ ունեցա ։Սկզբից հաղթեցի Սլովակիայի ներկայացուցչին, կիսաեզրափակչում էլ մենամարտեցի Լիտվացի մրցակցիս հետ ու հաղթեցի, ափսոս եզրափակչում պարտվեցի Իռլանդիայի ներկայացուցչին։ Այս մրցաշարից առաջ էլ Ռումինիայում կայացած միջազգային առաջնության ժամանակ բրոնզե մեդալ եմ նվաճել։ Կաշխատեմ լավ պարապել, որպեսզի հետագա մրցաշարերում ոսկե մեդալին հասնեմ ։

- Միսակ, իսկ ինչ ես մտածում այն պահին, երբ ռինգ ես դուրս գալիս։

- Մտածում եմ միայն հաղթանակի, լավ մենամարտ ցույց տալու մասին։ Անձնական մարզիչս Արման Հովիկյանն է։

Իսկ ահա Միսակի անձնական մարզիչը ԱՐՄԱՆ ՀՈՎԻԿՅԱՆԸ, այսպես բնութագրեց իր սանին.

- Միսակը շատ լավ մարզիկ է, շատ մեծ պոտենցիալ ունի, շատ աշխատասեր, նպատակասլաց բռնցքամարտիկ է։ Ես շատ գոհ եմ նրա ցուցաբերած արդյունքից, քանի որ նա առաջին անգամ էր մասնակցում նման մեծ մասշտաբով մրցաշարի ու արծաթե մեդալ նվաճեց, դա շատ մեծ արդյունք եմ համարում ։ Ես շատ մեծ հույսեր եմ կապում Միսակի հետ, նրա նվաճումների մասին դեռ շատ կլսենք աշխարհի տարբեր հարթակներից։ Շուտով Հունգարիայում մեծ մրցաշարի ենք մասնակցելու, իսկ հոկտեմբերին կլինի երիտասարդների Աշխարհի առաջնությունը, հուսով եմ, որ ամեն ինչ լավ կստացվի։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ