Մշակութային խաչմերուկ՝ հինգ երկրների արվեստագետների եւ արվեստասերների համար

Գեղագիտության ազգային կենտրոնի հրավերով մայիսի 31-ից հունիսի 17-ը Վրաստանից, Իրանից, Ֆրանսիայից, Շվեյցարիայից և Իտալիայից ժամանակակից արվեստագետներ վարպետության դասեր, աշխատարաններ, կլոր սեղան-քննարկում և հանդիպումներ կունենան Հայաստանում։

ԳԱԿ-ն իր երևանյան և մարզային ստորաբաժանումներով կդառնա արվեստային մեծ հարթակ այդ արվեստագետների համար՝ իրականացնելու և ներկայացնելու իրենց նախագծերն ու փորձը, փոխանցելու գիտելիքներն ու հմտությունները հայ պատանիներին և երիտասարդներին, հանդիպելու և փորձի փոխանակում ունենալու Հայաստանի տարբեր համայնքների արվեստագետների հետ։

Կերպարվեստ, թատերարվեստ, պարարվեստ, տիկնիկագործություն, թանգարանային գործ… նախագծի ընդգրկումը լայն է և շատ հետաքրքիր։ Այն դառնալու է մշակութային խաչմերուկ հինգ երկրների արվեստագետների և արվեստասերների համար։

Մասնակից արվեստագետներն են.

Շադի Վեդայի (Իրան) / տիկնիկագործություն

Շադի Վեդային բազմապլան արվեստագետ է. զբաղվում է նկարչությամբ, նկարազարդմամբ, վիզուալ պատմվածքների ստեղծմամբ, նիշերի ձևավորմամբ, թվային և անալոգային լուսանկարչությամբ, պապիե մաշեով, լինո/փայտափորագրությամբ և այլն: Մասնակցել է մի շարք խմբակային ցուցադրությունների աշխարհի տարբեր երկրներում, արժանացել մրցանակների: Նկարչության, գրաֆիկ դիզայնի, գրքերի ձևավորման փորձառությունից բացի, Շադի Վեդային նաև արվեստ է դասավանդել Իրանում՝ ինչպես հանրակրթական դպրոցում, այնպես էլ՝ բուհում:

Զաալ Աբաշիձե (Վրաստան) / պատմաբան

Զաալ Աբաշիձեն պատմական գիտությունների դոկտոր է, Կորնելի Կեկելիձեի անվան վրացական ձեռագրերի ազգային կենտրոնի տնօրենը: Միջնակարգ և բարձրագույն կրթության ոլորտում ավելի քան 35 տարվա աշխատանքային փորձ ունի: Զաալ Աբաշիձեն զբաղվում է ձեռագրերի ուսումնասիրման, պահպանման և ներկայացման հարցերով: Իր ղեկավարած կենտրոնում գործում է արևելյան և հայկական ձեռագրերի բաժինը, որտեղ աշխատում են Վրաստանում հայտնի հայագետներ:

Հերվե Ալեքսանդր (Ֆրանսիա) / գեղանկարչություն

Գեղանկարչության ոլորտում շուրջ 40 տարվա ճանապարհ անցած Հերվե Ալեքսանդրի աշխատանքների առանցքում տարբեր երկրների մշակույթներն ու այն գեղեցկությունն է, որ շրջապատում է մեզ բոլորիս: Նրա գործերը ճանաչելի են իրենց վառ գույներով, հաճախ՝ անսովոր ֆորմաներով: Սիրում է աշխատել նոր էքսպերիմենտալ տեխնիկաներով, համագործակցել տարբեր արվեստագետների և խմբերի հետ: Ունեցել է շուրջ 150 ցուցահանդես աշխարհի ավելի քան 50 երկրում:

Դանիելա Դելերչի (Իտալիա) / պարարվեստ

Խորեորգրաֆ, պարային ռեժիսոր Դանիելա Դելերչին միջազգային ճանաչում է ձեռք բերել բալետի ավանդական կառուցվածքի մեջ ներմուծած իր նորարարությունների շնորհիվ: Իր աշխատանքներում նա սինթեզում է արվեստի տարբեր տեսակներ ու տարրեր, ինչպես օրինակ՝ ճարտարապետությունը, լուսային, քաղաքային, տեքստիլ դիզայնը և այլն: Համագործակցում է տարբեր արվեստագետների և կենտրոնների հետ ողջ աշխարհում: Աշխատում է նաև որպես պարուսույց և ուսումնասիրում կարևոր ու նորարարական թեմաներ, ինչպիսին է, օրինակ, նոր տեխնոլոգիաների ազդեցությունը մարդու վարքի վրա:

Լուսիան Հոգ (Շվեյցարիա) / թատերարվեստ

Դրամատուրգ, ռեժիսոր Լյուսիեն Հոգի պիեսները բեմադրվել են Շվեյցարիայի և Գերմանիայի տարբեր թատրոններում: Նա նաև դասավանդում է, վարպետության դասեր անցկացնում աշխարհի տարբեր երկրներում: Որպես դրամատուրգ շատ է սիրում հետևել բեմադրական պրոցեսին: Գրում է ամենուր՝ ճանապարհին, հանգստի ժամին, նստած, թե քնած (ինչպես ինքն է կատակում): Շատ հետաքրքրված է հազվագյուտ կենդանիներով և ծաղիկների չորացմամբ, նաև գրողների ֆուտբոլային թիմի պաշտպանն է:

Ուսումնաճանաչողական և ստեղծագործական այս նախագիծը կիրականացվի Երևանում, Վանաձորում և Գորիսում: Այն հրաշալի հնարավորություն է մարզային արվեստասեր հանրության համար՝ ծանոթանալու միջազգային արվեստագետներին և նրանց ստեղծած արվեստին, ստեղծագործելու և ներկայացնելու տվյալ մարզի ազգային մշակութային ավանդույթներն ու հնարավորությունները:

Հրավիրյալ արվեստագետներին ևս մշակութային օրակարգ է սպասվում։ Հայկական արվեստին ու մշակույթին ավելի լավ ծանոթանալու համար նախատեսվում են այցելություններ թանգարաններ և արվեստի այլ կենտրոններ։ Նրանք նաև հանդիպումներ կունենան հայ ժամանակակից արվեստագետների հետ:

Նախագծի մեկնարկը կտրվի մայիսի 31-ին: Նախագիծն իրականացնում է ՀՀ ԿԳՄՍ նախարարության աջակցությամբ։