Հետաքրքիր անակնկալներ` Երևանի Հրաչյա Ղափլանյանի անվան դրամատիկական թատրոնում

Հրաչյա Ղափլանյանի անվան դրամատիկական թատրոնը` «Գյումրու միջազգային թատերական փառատոնին»

 Գյումրիում ապրիլի 24-ից մայիսի 10-ը անցկացվելիք «Գյումրու միջազգային թատերական փառատոն»-ը մեկնարկվեց Երևանի Հրաչյա Ղափլանյանի անվան դրամատիկական թատրոնի «Մեծ լռություն» ներկայացմամբ, որը նվիրված է Հայոց ցեղասպանությանը զոհ դարձած մտավորականներին: Այս առիթով զրուցեցինք ՀՀ վաստակավոր արտիստ, Երևանի Հրաչյա Ղափլանյանի անվան դրամատիկական թատրոնի տնօրեն ԱՐՏԱՇԵՍ ՄԽԻԹԱՐՅԱՆԻ հետ:

— Պարոն Մխիթարյան, Երևանի Ղափլանյանի անվան դրամատիկական թատրոնը փառատոնին ո՞ր ներկայացմամբ է ներկայացել:

— Ապրիլի 24-ին ներկայացանք Պերճ Զեյթունցյանի «Մեծ լռություն» ստեղծագործությամբ: Բեմադրությունը` ՀՀ ժողովրդական արտիստ, ՀՀ պետական մրցանակի դափնեկիր, թատրոնի գեղարվեստական ղեկավար Արմեն Խանդիկյանինն է, որն արդեն քառասուն տարի է մեր բեմից չի իջնում: Մասնակցեցինք այն ներկայացման կազմով, որով հանդես ենք գալիս Երևանում:

— Եկեք անդրադառնանք ներկայացման սյուժեին: Չէ՞ որ պատահական չէ, որ փառատոնի շրջանակներում հենց ապրիլի 24-ին եք խաղացել այդ ներկայացումը: Այն իր մեջ ուներ նաև օրվա խորհուրդը:

— Այո, ներկայացումը Ցեղասպանության մասին է, թե մտավորականներին ոնց են հավաքել և կոտորել, որպեսզի կարողանան ազգի ճակատագիրը ավելի շուտ լուծել: «Մեծ լռության» գլխավոր հերոսներն են Դանիել Վարուժանը, Ռուբեն Սևակը, Կոմիտասը:

— Ովքե՞ր էին մարմնավորել Դանիել Վարուժանին, Ռուբեն Սևակին և Կոմիտասին:

— Գյումրիում Կոմիտասի կերպարը մարմնավորեց Արմեն Բարսեղյանը, Դանիել Վարուժանինը` ես, Ռուբեն Սևակինը` Լևոն Հախվերդյանը:

— Գյումրու հանդիսատեսը ինչո՞վ է տարբերվում երևանյան հանդիսատեսից:

— Կարող եմ միայն հիշել, որ 2019 թվականին հյուրախաղերով մեկնել էինք Գյումրի, որտեղ ներկայացրինք «Փարիզյան դատավճիռ» ներկայացումը: Գյումրու հանդիսատեսը պահանջկոտ է: Ինչը ողջունելի է, որովհետև դա ավելի է պարտադրում քեզ լինել շատ ավելի ներկայանալի, ճիշտ ու հավաստի: Այնպես որ, ծանոթ ենք Գյումրու հանդիսատեսին և սիրով հանդիպեցինք նրանց հետ:

— Թատրոնն ի՞նչ նոր հետաքրքիր անակնկալներ ունի հանդիսատեսի համար:

— Նոր, հետաքրքիր անակնկալներ մեր թատրոնում եղան մարտի 30,31-ին: Ունեցանք Մարկ-Ժիլբեր Սովաժոնի «Չաո» ներկայացման առաջնախաղը, որի բեմադրությունը ՀՀ վաստակավոր արտիստ, ՀՀ պետական մրցանակի դափնեկիր Հրաչյա Հարությունյանինն է: Գլխավոր դերում հանդես են գալիս Դիանա Մալենկոն և Ներսես Ավետիսյանը: Ի դեպ, ներկայացումը արդեն բավականին մեծ լսարան ունի: Տոմսերը շատ արագ սպառվում են: Աշխատում ենք ՀՀ ժողովրդական արտիստ, ՀՀ պետական մրցանակի դափնեկիր, թատրոնի գեղարվեստական ղեկավար Արմեն Խանդիկյանի բեմադրությամբ Ալֆրեդ դը Մյուսեի «Լորենցաչչո» ստեղծագործության վրա: Սկսվել են ինտենսիվ բեմական աշխատանքները: Աստծո կամոք, եթե որևէ խոչընդոտ ու խնդիրներ չլինեն, աշնանը կունենանք առաջնախաղ:

ՆՈՒՆԵ ԶԱՔԱՐՅԱՆ

Այս թեմայով Վարդավառի տոնին նվիրված՝ ջրցանները կանցնեն Երևանի վարչական շրջաններով Կրակոցներ Երևանի կենտրոնում. Քաջազնունու փողոցում «Նաչո Հոթել Երևան»-ի դիմաց հայտնաբերվել են պարկուճներ. ժամանել է Երևանի ոստիկանության պետը Նոր մանրամասներ Երևանի ՀԷԿ-ում բռնկված հրդեհից Հոբելյան նշելու ո՛չ տրամադրություն, ո՛չ միտք չկար. Հակոբ Ղազանչյանի 65-ամյակը դարձավ կրկնակի տոն Ախր, ո՞նց լուռ մնացիր, երբ 5000 լույս տղերքի դրեցին հողի տակ, երբ Արցախը հանձնեցին. Լեւս Դավթյան