«Օսկար»-ում հաղթեց Նավալնին, ձայնից զրկվեց Զելենսկին, իսկ կինոն պարտվեց քաղաքականությանը

Ամերիկյան կինոակադեմիայի «Օսկար» մրցանակաբաշխությունն այս տարի եւս ինտրիգների պակաս չունեցավ: Եթե նախորդ տարի մրցանակաբաշխությունը հիշարժան դարձավ ամերիկացի սթենդափ կատակերգու, դերասան, սցենարիստ, պրոդյուսեր, ռեժիսոր, հաղորդավար Քրիս Ռոքին տված ամերիկացի հայտնի դերասան Ուիլ Սմիթի ապտակով, ապա այս տարի բոլոր «ապտակները» քաղաքական էին: Իսկ հաղորդավարի անվտանգությունը՝ կրկնապատկված, ինչի մասին հենց բեմից նշեց կատակերգու եւ հեռուստահաղորդավար Ջիմի Քիմելը, ում վերապահված էր երեկոն վարելու պատիվը: Նա զգուշացրեց, որ նույնիսկ չփորձեն իրեն մոտենալ՝ չի՛ ստացվելու:

Վերադառնալով 95-րդ «Օսկար»-ում քաղաքական «ապտակներին»՝ նշենք, որ Ուկրաինայի նախագահ Վլադիմիր Զելենսկուն արդեն երկրորդ տարին անընդմեջ արգելվեց ելույթ ունենալ մրցանակաբաշխության ժամանակ: Սակայն, սա բոլորովին էլ չի նշանակում, թե ռուսաֆոբիայից զերծ են մնացել համաշխարհային աստղերը: Այս մասին է հուշում նաեւ Լավագույն օրիգինալ սաունդթրեք, Լավագույն արտասահմանյան ֆիլմ, Բեմադրող նկարչի լավագույն աշխատանք, Լավագույն օպերատոր անվանակարգերին արժանացած «Արեւմտյան ճակատում փոփոխություն չկա» (ռեժիսոր՝ Էդվարդ Բերգեր) ֆիլմի վերնագիրը: Այսպիսով՝ օսկարակիրների կողքին հայտնվեց ռուս ընդդիմադիր Ալեքսեյ Նավալնու ընտանիքը: Իսկ Նավալնու մասին պատմող կանադացի ռեժիսոր Դենիել Ռոերի ֆիլմը դարձավ Տարվա լավագույնը՝ վավերագրական ֆիլմերի շարքում:

Ի դեպ, Լավագույն վավերագրական ֆիլմ անվակարգում առաջադրված էր նաեւ ուկրաինական մի ֆիլմ, որը պատմում էր Լիսիչանսկի երեխաների սոցիալ-հոգեբանական վերականգնողական կենտրոնի մասին, բայց, արի ու տես, որ ուկրաինական թեման առհասարակ հոգնեցրել է Միացյալ Նահանգներին, մինչդեռ հակառուսականության հարցում շարունակում եմ մնալ գերոգեւորված:

Հատկանշական էր այն, որ «Ամեն ինչ ամենուր եւ միանգամից» ֆիլմը միանգամից 7 «Օսկար» արձանիկ կորզեց մրցանակաբաշխությունից, այդ թվում արժանանալով Լավագույն ֆիլմ գլխավոր մրցանակին: Լավագույն դերասանուհի դարձավ Միշել Յեոն՝ «Ամեն ինչ ամենուր եւ միանգամից» ֆիլմում իր դերակատարության համար: Նշենք, որ Յեոն առաջին ասիացի դերասանուհին է, որն արժանացավ «Օսկար»-ի: Նույն ֆիլմի ռեժիսորներ Դեն Կվան եւ Դենիել Շայներտը եւս դարձան տարվա լավագույնները: Երկրորդ պլանի լավագույն դերասանուհի Ջեյմի լի Քերթիսը եւ Երկրորդ պլանի լավագույն դերասան Կե Հուի Կուանը եւս օսկարակիր դարձան «Ամեն ինչ ամենուր եւ միանգամից» ֆիլմի շնորհիվ: Լավագույն օրիգինալ սցենար եւ Լավագույն մոնտաժ անվանակարգերում էլի մրցանակակիր դարձավ «Ամեն ինչ ամենուր եւ միանգամից» ֆիլմը:

Լավագույն դերասան ճանաչվեց Բրենդան Ֆրեյզերը՝ «Կետ» ֆիլմում կերտած իր կերպարի համար: Լավագույն երգը ոչ պակաս քաղաքական էր՝ «Naatu Naatu»-ն («RRR. Մոտակայքում մռնչում է հեղափոխությունը»):

Կարճամետրաժ լավագույն անիմացիոն ֆիլմը «Տղան, խլուրդը, աղվեսը եւ ձին» էր, խաղարկային ֆիլմը՝ «Հրաժեշտ իռլանդական ձեւով»-ը, վավերագրական ֆիլմը՝«Փղերին հմայողները»:

Ոչ պակաս ուշագրավ էր Լավագույն անիմացիոն ֆիլմի մրցանակակիրը՝ «Փինոքիո Գիլերմո դել Տորո»-ն: Այո, հուրախություն քաղաքական գործիչների՝ սուտ խոսելուց քիթը երկարող Փինոքիոն շարունակում է մնալ լավագույն հերոսների շարքում:

Լավագույն տեսողական էֆեկտների համար «Օսկարի» արժանացավ «Ավատար. ջրի ուղին» ֆիլմը, Լավագույն ադապտացված սցենար անվանակարգում՝ «Խոսում են կանայք» ֆիլմը, Լավագույն կոստյումները համարվեցին Ռութ Է. Քարտերի «Սեւ հովազ. Հավերժ Վականդա» ֆիլմի հագուստները: Ըստ «Օսկար» մրցանակաբաշխության, Լավագույն գրիմը «Կետ» ֆիլմում էր (Ադրիան Մորո, Ջուդի Չին, Անեմարի Բրեդլի):

Հավելենք, որ այս տարի ոչ միայն «Օսկար»-ն ապաքաղաքական չէր, այլ նաեւ կարմիր գորգն էլ կարմիր չէր: Գորգն այս տարի ո՛չ ավել, ո՛չ պակաս ծովափնյա ավազի գույնի է եղել: Մրցանակաբաշխության կազմակերպիչներն իրենց ընտրությունը հիմնավորել են՝ ասելով, որ ցանկանում են մայրամուտի ճանապարհը ծովափ հիշեցնի:

ՀՐԱՆՏ ՍԱՐԱՖՅԱՆ

Այս թեմայով Ախր, ո՞նց լուռ մնացիր, երբ 5000 լույս տղերքի դրեցին հողի տակ, երբ Արցախը հանձնեցին. Լեւս Դավթյան «Պայքար և արարում» ֆիլմը՝ նվիրված ՀՀ երրորդ նախագահ Սերժ Սարգսյանի ծննդյան 70-ամյակին Թեստ․ ո՞ր բառն է բաց թողած «Կեղնի մե օրըմ, օր ․․․ տեսնիմ, թե էս աշխարհն ընչի է էսպես ծուռ» Ովքեր են «Արտավազդ-2024» մրցանակաբաշխության հաղթողները Տարվա լավագույն կին դերակատար ճանաչվեց Արաքսյա Մելիքյանը