Պուտինն ու Լուկաշենկոն այսօր դարձյալ քննարկել են Բելառուսում ստեղծված իրավիճակը
Արխիվ 16-20![Պուտինն ու Լուկաշենկոն այսօր դարձյալ քննարկել են Բելառուսում ստեղծված իրավիճակը](/timthumb.php?src=disc/old16-20/118961.png&w=780)
Ռուսաստանի նախագահ Վլադիմիր Պուտինը և Բելառուսի նախագահ Ալեքսանդր Լուկաշենկոն կիրակի շարունակել են քննարկել Բելառուսում ստեղծված իրավիճակը՝ հաշվի առնելով նաև արտաքինից երկրի վրա ճնշում գործադրելու հարցը: Այս մասին հայտնում է Интерфакс-ը՝ մեջբերելով Կրեմլի մամլո հաղորդագրությունը:
«Ռուսական կողմը վերահաստատել է ծագած խնդիրների կարգավորման համար անհրաժեշտ աջակցություն ցուցաբերելու պատրաստակամությունը՝ Միութենական պետություն ստեղծելու մասին պայմանագրի սկզբունքների հիման վրա, ինչպես նաև անրաժեշտության դեպքում՝ Հավաքական անվտանգության պայմանագրի կազմակերպության գծով»,- ասվում է հաղորդագրության մեջ:
Հիշեցնենք, որ նախագահները ևս մեկ հեռախոսազրույց էին ունեցել նախօրեին՝ քննարկելով Բելառուսում օգոստոսի 9-ին կայացած ընտրություններից հետո տիրող իրավիճակը: Ավելի ուշ Բելառուս առաջնորդը հայտնել էր, որ առաջին իսկ հարցման դեպքում Ռուսաստանը աջակցություն կցուցաբերի երկրում անվտանգության ապահովման համար:
Նախագահների հեռախոսազրույցից ժամեր անց ՀԱՊԿ-ի մամլո քարտուղար Վլադիմիր Զայնետդինովը հայտարարել էր, որ Բելառուսը կազմակերպությունից օգնություն կարող է խնդրել, երբ երկրի պաշտպանությանն արտաքին վտանգ սպառնա:
Ընտրություններից հետո ամեն օր բողոքի ցույցեր են տեղի ունենում Բելառուսի տարբեր քաղաքներում. քաղաքացիներն իրենց դժգոհությունն են հայտնում ընտրությունների պաշտոնական արդյունքներից, որոնց համաձայն հաղթող է ճանաչվել երկրի գործող նախագահ Ալեքսանդր Լուկաշենկոն: