«Կառավարությունը բռնազավթեց եւ բարեհաջող մարսեց օրգանական քիմիայի ինստիտուտի մասնաշենքը». գիտնական

Այսօր տեղի ունեցավ գիտնականներ Հրայր Ազիզբեկյանի և Ռոբերտ Հակոբյանի մամուլի ասուլիսը։ Բանախոսներն անդրադառնում են Գիտությունների ազգային ակադեմիայի հնարավոր լուծարման հարցին, ինչպես նաև ԿԳՄՍ նախարարության ներկայացրած «Բարձրագույն կրթության և գիտության մասին» օրենքի նախագծի թերություններին։ Հիշեցնենք, որ ըստ ԿԳՄՍ նախարարության «Բարձրագույն կրթության և գիտության մասին» օրենքի նախագծի՝ նախատեսվում է լուծարել Գիտությունների ազգային ակադեմիան։

«Կառավարությունը բռնազավթեց եւ բարեհաջող մարսեց օրգանական քիմիայի ինստիտուտի մասնաշենքը: Երիտասարդ գինականների աջակցության ծրագիրը մինչ օրս դադարեցված է, թեեւ բոլորը կարծում էին, թե մեկ օրվա գործ է: Սուպեր նախարարության կողմից առաջարկվել է սուպեր օրենք, որն առաջարկում է միացնել գիտությունը եւ կրթությունը, արդեն ակնհայտ է դրա աբսուրդության աստիճանը: Վերջին աբսուրդներից մեկը վարչապետի կրկնակի՝ երկու անգամ իրար վրա արված հայտարարություններն էին գիտնականների սուրճ խմելու վերաբերյալ, ինչը իրականության հետ որեւէ կապ չունի, ինչը մեծ վրդովմունք առջացրեց»,-նշեց Հրանտ Ազիզբեկյանը՝ հավելելով, թե չի կարծում, որ միտքը դժվար թե վարչապետի գյուտն է:

Iravunk.com-ը հարց ուղղեց գիտնական Հրայր Ազիզբեկյանին։

- Ի՞նչ եք կարծում, ինչո՞վ է պայմանավորված ներկայիս իշխանությունների, մասնավորապես ԿԳՄՍ-ի նախարարության թիրախավորումը Գիտությունների ազգային ակադեմիային։

- Ես կարծում եմ, որ սրանք ավելի շատ պոպուլիստական մղումներով հոսքեր են,այսինքն,թե իբր իրենց մոտ շատ մարդիկ են գնում,ամենատարբեր բողոքներով,իսկ նախարարությանն էլ թվում է, թե դա ամբողջ ժողովրդի պահանջն է։ Կամ եվրոպական ատիաններից գալիս են խորհրդատուներ,որոնք խելոք-խելոք դեմքերով նստած, ինչ-որ անգլերեն ճառեր են ասում և ներշնչված միջազգային կարևորությունից, ծրագրեր են գրվում, որոնք տեղայնացված չեն։ Կառավարությունը որևէ հիմնավորում չի բերում,թե ինչու է ուզում սպամել այս ամենը և չի էլ կարող բերել, որովհետև պետությունը չունի զարգացման հստակ ռազմավարություն։ 

ՀԱՅԿ ԳԵՎՈՐԳՅԱՆ