«10 ամիսների ընթացքում միայն տեսել ենք քաղաքապետարան-«Սանիթեք» փոխադարձ մեղադրանքներ»

Ամառային այս տապին երեւանյան թիվ մեկ խնդիրը շարունակում է մնալ աղբահանության հարցը: Մարդիկ արդեն հույսները կտրել են քաղաքապետարանից եւ այլընտրանքային քաղաքապետարան նախաձեռնությամբ հանդես եկել: ՀՀ վարչապետի նախաձեռնությամբ` իր եւ Երեւանի քաղաքապետ Հայկ Մարությանի ֆեյսբուքյան ուղիղ եթերն անգամ չփրկեց իրավիճակը, աղբարկղերը Երեւանում կամաց-կամաց վերածվում են բլուրների ու սարերի` գարշահոտությամբ պատելով ողջ մայրաքաղաքը: Ստեղծված իրավիճակի մասին «Իրավունք TV»-ի տաղավարում զրուցել ենք Երեւանի ավագանու «Բարգավաճ Հայաստան» խմբակցության ղեկավար ՄԻՔԱՅԵԼ ՄԱՆՐԻԿՅԱՆԻ հետ:

- Իսկապես, Երեւանում այսօր աղբահանության խնդիրը թիվ մեկ հրատապ լուծում պահանջող հարցերից մեկն է, որը պետք է քաղաքային իշխանությունները ձեռնամուխ լինեն: Կարծես թե քաղաքապետարանը որոշակի քայլեր է անում, որպեսզի այդ խնդիրը լուծի, սակայն ցավով պետք է արձանագրեմ, որ թեպետ նոր քաղաքային իշխանությունը 10 ամիս է գործում է, բայց այս ամիսների ընթացքում միայն տեսել ենք Երեւանի քաղաքապետարան եւ «Սանիթեք» փոխադարձ մեղադրանքներ: Այս 10 ամիսները համարում եմ կորցրած, այդ ընթացքում կարելի էր շատ ավելի մեծ արդյունքների հասնել եւ այսօր չունենալ այն իրավիճակը աղբի հետ կապված, որն ունենք Երեւանում: Ամառվա այս ամիսներին, երբ բազմաթիվ զբոսաշրջիկներ են գալիս Երեւան, արդեն ֆլեշ-մոբ են անում եւ բացի Երեւանի գեղատեսիլ եւ պատմական վայրերից, նաեւ նկարվում են աղբի հետ եւ, իհարկե, մեղադրում քաղաքային իշխանությանը` մայրաքաղաքն այսպիսի վիճակի հասցնելու համար:

– Պարոն Մանրիկյան, գործող քաղաքապետի նախընտրական խոստումներից մեկը հենց այն էր, թե «մաքրելու ենք քաղաքը»: Ինչո՞վ էին զբաղված այս 10 ամիսների ընթացքում:

– Այո, Հայկ Մարությանի նախընտրական խոստումներից մեկն էլ այն էր, որ պետք է մաքրեն քաղաքը աղբից, սակայն, կարծես թե, քաղաքային գործադիրը ուշ է զարթոնք ապրել այս հարցում եւ նոր-նոր է ձեւավորում այդ քայլերը` գնելով տեխնիկա: Ինչպես գիտեք, Երեւանի ավագանին ամիսներ առաջ որոշում կայացրեց, որով ստեղծվեց քաղաքային երկրորդ սանմաքրման օպերատորը: Ներկա պահին այդ օպերատորն ունի 13 ավտոմեքենա, «Սանիթեքն» էլ ունի 13-15 ավտոմեքենա, որոնք ամեն օր դուրս են գալիս աղբահանություն կատարելու: Իհարկե, այսքանը բավարար չէ, եւ քաղաքապետարանը շարունակում է գնումներ կատարել, մասնավորապես` ճանապարհին են 2-3 «Կամազ» մակնիշի ավտոմեքենա: Այսպես շարունակաբար համալրվելու են: Նաեւ նախագիծ է առաջարկվել, որ պահեստային ֆոնդից մեկ միլիարդ 726 մլն դրամ հատկացնել քաղաքային երկրորդ օպերատորին, որից մեկ միլիարդ 571 մլն-ը հատկացվելու է, որպեսզի գնվի նոր տեխնիկա, մասնավորապես` աղբահավաք մեքենաներ, փոշեկուլներ, փոքրիկ տրակտորներ, որոնք ձնամաքրման, ձնահեռացման աշխատանքներ կկատարեն, եւ 155 մլն հատկացվել է հազար նոր մետաղական աղբաման գնելու համար: Այս ամենը շատ լավ է, բայց այն պետք է լիներ ավելի վաղ` դեռ նոյեմբեր-դեկտեմբեր ամիսներին: Սակայն, մեր խմբակցության համար կան բազմաթիվ, այսպես ասած, մութ անկյուններ, թե ինչպիսի բանակցություններ են եղել մինչ այն պահը, երբ դադարեց Երեւանի քաղաքապետարանի եւ «Սանիթեքի» միջեւ բանակցությունները, եւ այրվեցին կամուրջները: Մենք Հայկ Մարությանից պահանջել էինք ողջ նամակագրությունը, որոնք իրենք ունեցել են «Սանիթեքի» հետ, երբ նա ստանձնել է Երեւանի քաղաքապետի պաշտոնը` հոկտեմբերից մինչ մայիս-հունիս ընկած ժամանակահատվածը: Բայց ստացել ենք մարտից մինչեւ մայիս ընկած ժամանակահատվածի նամակագրությունը, որում էական ոչինչ չի ասվում: Բայց քաջատեղյակ լինելով խնդրից` ունեմ տեղեկատվություն, որ նախնական պայմանավորվածություն է եղել, որ Երեւանի քաղաքապետարանը կգնի աղբահանության համար մեքենաներ, նաեւ կտրամադրի անձնակազմ` վարորդներ, մաքրողներ եւ վարձակալությամբ կտա «Սանիթեքին», որին նրանք համաձայնել են: Սակայն, ամիսներ անց քաղաքապետարանը տեղեկացրել է «Սանիթեքին», որ այդ պայմանավորվածությունը չի լինելու: Սա այն է, ինչ ունենք այսօր, ինչը կարող է լուրջ հետեւանք ունենալ, որովհետեւ երբ «Սանիթեք» ընկերությունը միջազգային արբիտրաժային դատարան դիմի, այն կլինի լուրջ խաղաքարտ իրենց ձեռքում:

ՀՐԱՆՏ ՍԱՐԱՖՅԱՆ

Հ.Գ.- Հարցազրույցն ամբողջությամբ դիտեք տեսանյութում.