Ինչ նպատակ են հետապնդում ՀՀ-ում տեղի ունեցած աղմկոտ խուզարկությունները. գերմանացի փորձագետ (Տեսանյութ)

«Քրիստոնեական արժեհամարգի եւ ավանդական ընտանիքի պաշտպանության նախաձեռնության» եւ նրա ղեկավարների նկատմամբ Հայաստանի իրավապահների իրականացրած գործողությունները միջազգային հարթակներում գնահատվում են որպես հետապնդում իրենց հայացքների եւ իրականացրած հասարակական գործունեության համար: Այս մասին սեպտեմբերի 19-ին Վարշավայում կայացած ԵԱՀԿ լիագումար նիստում հայտարարությամբ է հանդես եկել գերմանացի փորձագետ, լրագրող ԷՆԹՈՆԻ ԶԻՎԵՐՏԸ:

Գերմանական RossaPrimavera լրատվական գործակալությունը ներկայացնող փորձագետի հետազոտության թեմաներից մեկը եղել է գենդերային քաղաքականության մշակութային ազդեցությունն ազգային անվտանգության վրա, որին անդրադառնալով՝ իր ելույթում Է. Զիվերտը նախեւառաջ նշել է. «Իմ հետազոտության ընթացքում ես ավելի ու ավելի եմ համոզվում, որ գենդերային բաղադրիչի կոշտ ինտեգրումը չի բերում հասարակության մեջ դրական փոփոխությունների, այլ նպաստում է զոհի մշակույթի ստեղծմանը, հասարակության մասնատմանը, քաղաքական գործիչների եւ խմբերի արմատականացմանը։ Մի խոսքով՝ այն ամենին, ինչն էապես խարխլում է ժողովրդավարական հասարակության հիմքերը»։

Գերմանացի փորձագետը, որպես թարմ օրինակ, ներկայացրել է, թե ինչպես է դա տեղի ունենում։

«Տարվա սկզբին, Հայաստանում «թավշյա հեղափոխության» արդյունքում իշխանության եկավ նոր կառավարություն։ Այդ նոր կառավարությունն իրեն ներկայացնում էր որպես եվրոպական բարձր գաղափարների եւ արժեքների կրող։ Այդ արժեքների բաղկացուցիչ մասն է կազմում նաեւ ազգային մշակույթի մեջ գենդերային բաղադրիչի ներդրումը։ Իրադարձությունների նման ընթացքը եվրոպական հանրության աջակցությունը ստացավ դեռեւս ապրիլի վերջին։ ԵՄ-ն խոստացավ նաեւ ընդլայնել համագործակցությունը նոր կառավարության հետ՝ ազգային ռազմավարության առավել արդյունավետ վերակառուցման նպատակով։ Հայաստանում իշխանափոխությունն աջակցություն ստացավ նաև միջազգային այլ խաղացողների կողմից։ Սակայն այդ կառավարությունն ի սկզբանե սկսեց չարաշահել իրավապահ համակարգը  այլախոհներին հետապնդելու համար. նրանց, ովքեր համամիտ չեն գենդերային հիմքով մոտեցմանը՝ որպես մշակույթի բաղադրիչ», - ընդգծել է Զիվերտը եւ շեշտել, որ խոսքը  «Քրիստոնեական արժեհամակարգի եւ ավանդական ընտանիքի պաշտպանության» նախաձեռնության մասին է։

«Այս շաբաթվա սկզբում այդ կազմակերպության գրասենյակում եւ հենց ակտիվիստների մոտ իրականացվեցին խուզարկություններ, իսկ նրանց տեխնիկական սարքավորումներն առգրավվեցին:  Իրավապահ մարմինների կողմից այս գործողություններն իրականացնելու պաշտոնական առիթը ԱԱԾ տնօրեն Արթուր Վանեցյանի եւ ՀՔԾ պետ Սասուն Խաչատրյանի հեռախոսային խոսակցության աղմկահարույց գաղտնալսումն էր, որը հրապարակվել էր սեպտեմբերի 5-ին։ Այդ խոսակցության ընթացքում հատուկ ծառայությունների երկու ղեկավարները քննարկում էին, թե ինչ ձեւով են ճնշում գործադրելու իրավապահ եւ ռեպրեսիվ տարբեր մարմինների վրա՝ քաղաքական ընդդիմությանը վախեցնելու եւ ոչնչացնելու համար», - մանրամասնել է գերմանացի փորձագետը։

Էնթոնի Զիվերտի գնահատմամբ՝ բացարձակ աբսուրդային իրավիճակ է, որովհետեւ դժվար է պատկերացնել, թե ընտանիքի իրավունքների պաշտպանությամբ հանդես եկող այս փոքրաթիվ կազմակերպությունը ինչպե՞ս կարող էր գաղտնալսել Հայաստանի հատուկ ծառայությունների ղեկավարների հեռախոսային խոսակցությունը։

«Ակնհայտ է, որ այդ կազմակերպության հիմնական մեղավորությունը կայանում է նրանում, որ չի կիսում ընտանիքի վերաբերյալ գենդերային սկզբունքներն ու մոտեցումները։ Հատուկ ծառայությունների հետ կապված նման աղմկահարույց դեպքը ժողովրդավարական երկրներում, ինչպես, օրինակ Գերմանիայում, կհանգեցներ պատասխանատու պաշտոնյաների հրաժարականին։ Իսկ Հայաստանում նման ժողովրդավարական արձագանքը բացակայում է», - նկատել է Է. Զիվերտը:

Գերմանացի փորձագետը ԵԱՀԿ լիագումար նիստում բարձրաձայնել է, որ Հայաստանում առկա է  ճնշում ընդդիմության, ԶԼՄ-ների վրա։ Օրինակ, YerevanToday լրատվականի վրա։

«Մենք տեսնում ենք, թե ինչպիսի քաղաքական մշակույթ են ձեւավորում գենդերային սկզբունքները։ Գերմանիայում մենք եւս նման գործընթացների ականատեսն ենք լինում», - եզրափակելով խոսքն՝ ասել է նա:

ՀՐԱՆՏ ՍԱՐԱՖՅԱՆ

Հ.Գ.- Առավել մանրամասն դիտեք տեսանյութում.