Փոքրիկ Ռաուլը մկրտվեց Սուրբ Հակոբ եկեղեցում. Կարինա Դանելյանն անկեղծանում է՝ ընտանիքի եւ նոր նախագծերի մասին (Բացառիկ ֆոտոշարք)

Քանաքեռի Սուրբ Հակոբ եկեղեցում տեղի է ունեցել հաղորդավարուհի, պրոդյուսեր Կարինա Դանելյանի եւ ֆուտբոլիստ Տիգրան Վարդանյանի որդու մկրտության արարողությունը: Փոքրիկ Ռաուլը մկրտվեց՝ Արժանապատիվ Տեր Շմավոն քահանա Ղեւոնդյանի ձեռամբ, իսկ կնքահայրն, ինչպես քրոջ՝ Մարիկայի մկրտության ժամանակ, այնպես էլ Ռաուլի, ոճաբան ԳԵՈՐԳԻ ՀԱՐՈՒԹՅՈՒՆՅԱՆՆ էր: Ի դեպ, մկրտության առթիվ ԿԱՐԻՆԱ ԴԱՆԵԼՅԱՆՆ առաջին անգամ համացանցում հրապարակեց որդու՝ Ռաուլի լուսանկարները, եւ երկարատեւ լռությունից հետո զրուցեց «Իրավունքի» հետ:

- Կարինա, Ռաուլի ծննդյան մասին մամուլում եւ սոցցանցերում եզրակացրել էին, թե ֆուտբոլիստ հայրիկը որդուն անվանակոչել է` ի պատիվ Մադրիդի «Ռեալի» լեգենդար ֆուտբոլիստ, հարձակվող Ռաուլ Գոնսալեսի անունով: Արդյոք այդպես է:

- Ասեմ, որ անկախ այն մեծ սիրուց ու հարգանքից, որն ունեմ ֆուտբոլի եւ Ռաուլ Գոնսալեսի նկատմամբ՝ տղայիս անունն իր պատվին չէ (ժպտում է, - հեղինակ): Հղիության 9 ամիսներին ես եւ ամուսինս անընդհատ անուն էինք մտածում մեր փոքրիկի համար, սակայն սրտով ոչ մի անուն, կարծես, չէի զգում: Արդեն մի քանի օրից պետք է ծնվեր որդիս ու շատ պատահական մտքիս, սրտիս եւ լեզվիս եկավ Ռաուլ անունը… Ամուսինս եւ մայրս միանգամից հավանություն տվեցին: Մի քանի օրից մեր ընտանիքին միացավ Ռաուլ Վարդանյանը: Տղաս ծնվեց հունվարի 5-ին:

- Արդեն կանխորոշե՞լ եք, թե ծնողներից ո՞ւմ ճանապարհով են գնալու Ռաուլն ու Մարիկան:

- Մարիկան ատամհատիկին ընտրել էր լրագրողի մասնագիտությունը… Մի քանի օր առաջ Ռաուլն իր ատամհատիկին ընտրեց «դեսպան» գրությամբ կոնֆետը: Չգիտեմ՝ ինչպես կստացվի, սակայն մի բան հաստատ է՝ Մարիկան շատ աշխույժ, ակտիվ, արտիստիկ աղջիկ է եւ շատ ճկուն: Իսկ Ռաուլը գնդակին շատ ուժեղ հարվածում էր ավելի վաղ, քան ասաց՝ մամա: Նույնիսկ մանկաբույժն էր զարմացել… Աստված առաջ, կապրենք, կտեսնենք:

- Արդեն Ռաուլն ութ ամսական է, չե՞ք պատրաստվում խախտել լռությունն ու վերադառնալ հեռուստատեսություն՝ նոր նախագծերով:

- 5 տարի առաջ որոշեցի մի փոքր հանգստանալ հեռուստատեսությունից, չէ՞ որ ուղիղ 11 տարի աշխատել էի այդ ոլորտում: 5 տարվա ընթացքում առաջարկներ շատ են եղել, սակայն դրանցից ոչ մեկն ինձ չգրավեց: Այս ընթացքում աշխատել եմ այլ ոլորտում, ընդ որում՝ բավականին մեծ ու պատասխանատու աշխատանք եմ կատարել՝ ղեկավարելով բիզնես: Եվ, իհարկե, զուգահեռ ղեկավարել եմ Citrus Kids Club-ը, որի հիմնադիրն եմ, զբաղվում ենք մանկական միջոցառումներով: Ինչ վերաբերում է լռությունը խախտելուն, ասեմ, որ շատ շուտով դարձյալ կլինեմ հեռուստանախագծում: Կլինի նոր նախագիծ, նոր մոտեցում, նոր ասելիք, սակայն մանրամասների մասին կխոսենք հաջորդիվ:

Նյութը՝ ՀՐԱՆՏ ՍԱՐԱՖՅԱՆԻ