Միլիարդատեր Բեզոսն ասել է, որ աշխարհն ավելի լավն է դարձել ամեն ինչում, բացի մի բանից

Amazon-ի հիմնադիր, աշխարհի ամենահարուստ մարդկանցից մեկը՝ Ջեֆ Բեզոսը, կարծում է, որ չպետք է իդեալականացնել անցյալը։ Անցյալ ամիս ելույթ ունենալով New York Times-ի DealBook Summit-ում, նա նշեց, որ կյանքի շատ ասպեկտներ զգալիորեն բարելավվել են վերջին 50 տարիների ընթացքում. մանկական մահացության մակարդակը նվազել է, գրագիտության մակարդակն աճել է և նաև նվազել է աղքատության համաշխարհային մակարդակը: Բացառություն է միայն մեկ ոլորտ։

«Երբ մարդիկ խոսում են հին ու բարի օրերի մասին, դա նման է պատրանքի»,- ասել է Բեզոսը։ «Այսօր գրեթե ամեն ինչ ավելի լավ է, քան եղել է… մի բացառությամբ, դա բնությունն է»,- ասաց նա՝ ընդգծելով, որ դարերի ընթացքում մարդկության զարգացումը սպառել ու աղտոտել է համաշխարհային օվկիանոսները, գետերը, անտառները։

Բեզոսի գլխավորած Amazon-ը նույնպես այս գործընթացի մաս է կազմում: Ընկերությունը 2022 թվականին արտանետել է 70,74 միլիոն տոննա ածխաթթու գազ, ինչը կազմում է ԱՄՆ-ի ընդհանուր արտանետումների մոտավորապես 1,1%-ը: Այս ցուցանիշը գերազանցում է Walmart-ի նույն տարվա արտանետումները:

Amazon-ը պարտավորվում է նվազեցնել արտանետումները և նախատեսում է մինչև 2040 թվականը հասնել ածխածնի զրոյական արտանետումների: Ընկերության տարեկան արտանետումները աստիճանաբար նվազում են՝ համաձայն նրա 2023 թվականի կայունության զեկույցի։

Բեզոսի մտքերը կրկնում են հանգուցյալ միլիարդատեր ներդրող Չարլի Մունգերի տեսակետը, ով 2022 թվականին նշել է, որ մարդիկ հաճախ թերագնահատում են առաջընթացը:

«Մարդիկ ավելի դժգոհ են իրերի դասավորությունից, քան այն ժամանակ, երբ ամեն ինչ շատ ավելի դժվար էր», – ասում էր Մունգերը: «Իմ տարիքի մարդու համար դա տարօրինակ է, քանի որ ես ապրել եմ Մեծ դեպրեսիայի տարիներին, երբ դժվարությունները անհավանական էին», – ավելացնում էր նա:

Բեզոսը մեծ ներդրումներ է կատարում տիեզերքի հետազոտման մեջ իր Blue Origin ընկերության միջոցով: Վերջին երկու տասնամյակների ընթացքում նա միլիարդավոր դոլարներ է ծախսել հրթիռների, տիեզերանավերի և լուսնային վայրէջքների մշակման վրա:

«Անսահման էներգիա, անսահման հումք»,- ասել է Բեզոսը՝ ենթադրելով, որ տիեզերքը և մոլորակները կարող են փոխհատուցել Երկրի բնական ռեսուրսների պակասը: Օրինակ, որոշ ռեսուրսներ, ինչպիսիք են թթվածինը, ջուրը և մեթանը, կարող են արդյունահանվել Մարսի վրա, համաձայն NASA-ի արդյունքների:

2021 թվականից ի վեր Blue Origin-ն իրականացրել է մարդկանցով ինը թռիչք, վերջինը՝ 2024 թվականի նոյեմբերին: Բեզոսը կարծում է, որ դա կդառնա «լավագույն բիզնես», բայց խոստովանում է, որ մեծ արդյունքների հասնելու համար ժամանակ կպահանջվի:

«Ծրագիր Բ չկա: Մենք պետք է փրկենք Երկիրը», – ասում է նա: «Մենք ռոբոտացված զոնդեր ենք ուղարկել Արեգակնային համակարգի բոլոր մոլորակներ և դա լավ է», – ընդգծել է Բեզոսը: