Կիեւի մեծ հակահարձակումը վերջացա՞վ, թե՞ Կուրսկում տեղի ունեցածը միայն սկիզբն էր (Քարտեզ)

Այն, որ Թրամփի ինագուրացիայի շեմին ուկրաինական բանակը պետք է փորձեր ինչ-որ մասշտաբային գործողություն իրականացնել, որի համար կուտակում էր հնարավորինս խոշոր ռեզերվներ, քանիցս ներկայացնելու առիթ ունեցել ենք: Եվ ահա երեկ ուկրաինական կողմը նման մի փորձ արեց` Կուրսկի ճակատում հարվածելով Բերդին և Նովոսոտնիցկ բնակավայրերի ուղղությամբ:

Հիմնականը Բերդինի ուղղությունն էր, որտեղ ուկրաինական կողմը մի քանի փուլով գրոհելով զգալի ուժերով, հասավ այս բնակավայրի մատույցներին: Բայց այդքանով ամեն ինչ գոնե այս պահին վերջացավ. ռուսական ուժերը հետեւողականորեն ոչնչացրին ուկրաինական զրահատեխնիկան, անպաշտպան մնացած հետեւակը: Մնացորդները քաշվեցին ելման դիրքեր:

Միաժամանակ ռուսական ուժերը հարվածներ սկսեցին նաեւ Կուրսկի այլ հատվածներում, այդ թվում` Սուջայի հարավային ուղղությամբ, որը ուկրաինական ուժերի համար լուրջ ահազանգ էր: Այսինքն, անկախ նրանից, թե ինչ առաջխաղացում կունենան Բերդինի ուղղությամբ, եթե թիկունքը փակվի, այդ առաջխաղացմամբ հանդերձ կմնան «կաթսայում»:

Այս վերջին էպիզոդը հուշում է, որ ուկրաինական այս հարձակմանը ռուսները սպասում էին: Ավելին, վերջին օրերին ռուսական հրթիռները, ավիացիան եւ անօդաչուները գերակտիվ տեմպերով հարվածում էին ուկրաինական ուժերի թիկունքային գոտիներին` սկսած Սումի տարածաշրջանից, վերջացրած Կուրսկում ուկրաինական ուժերի հիմնական բազայի վերածված Սուջայի հատվածով: Կան փորձագիտական գնահատումներ, որ միայն Սուջայի հատվածում վերջին օրերին ոչնչացվել է մոտ 50 միավոր տեխնիկա, այդ թվում` զրահատեխնիկա: Արդյունքում, ուկրաինական ուժերը հասան Բերդինին եւ հետ քաշվեցին:

Սակայն ռուսական մի շարք հեղինակավոր փորձագետներ հուշում են, որ երեկվա մարտերը դեռ շուտ է հաղթանակ համարելը: «Բերդինի ուղղությամբ ուկրաինական կողմը գրոհում էր համեմատաբար սահմանափակ ուժերով, որն ավելի շատ ուժեղացված մարտական հետախուզության տեսք ուներ: Միգուցե այն հաշվով, որ հաջողության դեպքում այդտեղ կմտցվեն հմնական ուժերը, թե այլ գլխավոր հարված են նախատեսել, եւ Բերդինի ուղղությունն ընդամենը շեղող մանեւր էր, դեռ հասկանալ է պետք: Ամեն դեպքում, փաստն այն է, որ մի վերջին մեծ հարձակման համար Կիեւի կուտակած ուժերի զգալի մասը դեռ խաղի մեջ չի դրվել»:

Բայց կա նաեւ այլ տարբերակ. Բերդինի ուղղությամբ երեկվա ձախողումը ոչ միայն ուկրաինական ռազմական, այլ նաեւ` քաղաքական ղեկավարության համար կարող է ահազագ դառնալ: Ռուսները սպասում են նման հարձակման, եւ Բերդինի օրինակը կարող է դառնալ մեծ պարտության ազդակ: Իսկ այս պահին, եթե ձախողվի Կիեւի վերջին ռազմական հույսը, դա նաեւ խոշոր քաղաքական պարտություն կդառնա: Առավել եւս, որ նման հարձակման համար վերջին ուժերը կուտակելով, Կիեւը փաստացի դատարկել է մյուս հատվածները, որտեղ ռուսներն արագ տեմպերով հարձակվում են: Այսինքն, այս պահին մեծ հարձակումից հրաժարվելն ու ուժերը մյուս վտանգավոր գոտիներ նետելը կարող է ամենատրամաբանական տարբերակ լինել:

Չնայած, Զելենսլին մինչ այս իրեն ամենեւին էլ չի դրսեւորել ամենատրամաբանական ուղղությամբ շարժվող լիդերի կերպարում: Այսինքն, դեռ մեծ է մնում հավանականությունը, որ դեռ եղած ուժերը եւս կնետվեն մսաղաց: Հենց նույն ուղղությունենրով, թե այլ գլխավոր հարված ունեն, դա արդեն այլ հարց է: