Ինչպե՞ս է ուշ ժամին ուտելն անդրադառնում մարդու առողջության վրա

Կատալոնիայի Բաց համալսարանի փորձագետները, որոնք հետազոտության արդյունքները հրապարակել են Nature-ի հավելված Nutrition Diabetes հանդեսում, բացահայտել են ուշ սնվելու անսպասելի վտանգները: Գիտնականների միջազգային խումբն օրգանիզմում նյութափոխանակության գործընթացների վրա ուտելու ժամանակի ազդեցության մասին լայնածավալ հետազոտություն է անցկացրել։

Ժամը 17:00-ից հետո օրական կալորիաների ավելի քան 45%-ն օգտագործող մարդկանց օրգանիզմում նյութափոխանակության զգալի փոփոխություններ են հայտնաբերվել, գրում է Planet Today-ը։ Հիմնական խնդիրը ածխաջրերի նյութափոխանակության խախտումն է, որը կարող է տարբեր խրոնիկական հիվանդությունների զարգացում հրահրել։ Նախկինում փորձագետների մեծամասնությունը երեկոյան ուտելը հիմնականում կապում էր քաշի ավելացման հետ, սակայն նոր տվյալները զգալիորեն ընդլայնում են այդ խնդրի վերաբերյալ մեր պատկերացումները:

Հետազոտական ​​թիմը հետազոտել է քաշին առնչվող խնդիրներով կամ դիաբետի հակվածությամբ  50-70 տարեկան 26 կամավորների: Մասնակիցները բաժանվել են երկու հակապատկեր խմբերի՝ ուտելու տարբեր գրաֆիկներով: Չնայած միանման սննդակարգերին և կալորիականության ընդունմանը, երկրորդ խումբը, որն իր կերակուրների մեծ մասը օգտագործում էր երեկոյան ժամը 5-ից հետո, նյութափոխանակության ցուցանիշների զգալի վատթարացում է ցույց տվել:

Գիտնականներն ընդգծում են մարդու օրգանիզմի կենսաբանական առանձնահատկությունը՝ երեկոյան ժամերին զգալիորեն նվազում է գլյուկոզայի մշակման ունակությունը։ Դա նշանակում է, որ ուտելու ժամանակը ոչ պակաս կարևոր դեր է խաղում, քան դրա քանակն ու բաղադրությունը։ Ուշ ուտելը կարող է խրոնիկական բորբոքում առաջացնել, մեծացնել սրտանոթային հիվանդությունների վտանգն ու խանգարել նյութափոխանակության գործընթացներին:

Մասնագետների գործնական խորհուրդները հանգում են մի քանի հիմնական կետերի՝ հիմնական կերակուրները տեղափոխել օրվա առաջին կեսին, երեկոյան նվազագույնի հասցնել ածխաջրերն ու ճարպային սնունդը, թեթև և հավասարակշռված նախուտեստներ ընտրել: