Ռուսների «սյուրիպրիզային» ճեղքումը Պոկրովսկի առանցքային ճակատում

Պոկրովսկի ճակատում, ավելի կոնկրետ` այդ ճակատի արեւմտյան հատվածում ուկրաինական կողմին այդպես էլ չի հաջողվում ոչ թե կանգնեցնել, այլ գոնե դանդաղեցնել ռուսական ուժերի հարձակումը: Թերեւս նաեւ հաշվի առնելով, որ այդ հարձակումը համատարած է, շատ լայն ճակատով, ու ուկրաինական կողմի հնարավորությունները պարզապես թույլ չեն տալիս նույնքան համատարած պաշտպանություն կազմակերպել: Մինչդեռ, բավական է մեկ ճեղք, որ ռուսներն արագորեն թափանցեն դրանով` հարվածելով նաեւ հարակից տարածքներին:

Ինչեւէ, պատկերը սա է: Նախ, ռուսները հարձակվում են Պոկրովսկից դեպի արեւելք: Այն է, դեպի Դնեպրոպետրովսկի մարզ (մնում է 5-6կմ), նաեւ դրանով ամրացնում է բուն Պոկրովսկից արեւմուտք հարվածող ռուսական ուժերի թեւը:

Հենց այս վերջին հատվածում էլ երեկվա ընթացքում ռուսները եւս երկու առանցքային ձեռքբերում ունեցան: Նախ, գրավեցին Պեսչանի գյուղի «թաց հանք» (հանք թիվ 3), որն այս գոտում հիմնական պաշտպանական կետ էր: Արդյունքում գրավեցին ողջ այդ բնակավայրը եւ դրա արեւմտյան հարեւան Վոլկովոն: Ամենակարեւորը, այս պաշտպանական հանգույցները չեզոքացնելով, ռուսական ուժերը, ըստ նախնական տվյալների, արդեն իսկ դուրս են եկել Պոկրովսկի հիմնական` դեպի հարավ-արեւելք տանող մայրուղու մատույցներ: Միաժամանակ, նաեւ արդեն հասանելի է դառնում դեպի Դնեպրոպետրովսկ տանող մայրուղին, որը կորցնելու դեպքում ուկրաինական ուժերը Պոկրովսկում կհայտնվեն նախաշրջապատումային վիճակում (Քարտեզ 2):

Ու մինչ ուկրաինական ռազմական տեղեկատվական ռեսուրսների մոտ սկսվեց խուճապային տրամադրությունները, ռուսները հասցրեցին այս ամբողջ օպերացիայում թերեւս ամենահիմնական հարվածը: 

Այսպես, դեռ երկու-երեք օր առաջ ռուսները փոքրիկ ճեղքում ունեցան այս ճակատի արդեն արեւելյան թեւում` Միրնոգրադի արեւելքում անցնելով «Կազյոնիյ Տորեցկ» գետն ու ամրանալով այնտեղ: Թերեւս, դա ուկրաինական կողմն ընկալեց, որպես միայն պլացդարմի ստեղծում, որը կանխելու համար անտեղի համարեցին այդքան կարեւոր ռեզերվներն օգտագործել: Մինչդեռ, դատելով ամեն ինչից, դա մարտով հետախուզում էր: Ռուսները ֆիքսելով, որ ուկրաինական կողմի բոլոր հնարավոր ուժերը կենտրոնացրել են Պոկրովսկի արեւմուտքում, նշված գետանցման գոտուց մի փոքր արեւել` Վոզդվիժենկայի հատվածում անցան հիմնական հարձակման եւ հաջողությամբ ճեղքեցին ուկրաինական պաշտպանությունը (Քարտեզ 3):

Դա ինչ է նշանակում: Վոզդվիժենկայից մինչեւ ուկրաինական կողմի համար ծայրահեղ կարեւոր Պոկրովսկ-Կոնստանտինովկա մայրուղին ընդամենը 3-4 կիլոմետը է: Այսինքն, ռուսներն օգտվելով Պոկրովսկում ուկրաինական ուժերի թուլությունից, հիմա կփորձեն փակել քաղաքի հիմնական մայրուղիներից մեկը եւս` արեւելյանը: Իսկ դա, ի դեպ, ուկրաինական ուժերի համար սնուցման զարկերակ է նաեւ Տորեցկի հատվածում, որը եւս այս պահին մազից կախված վիճակում է:

Տիրելով այդ մայրուղուն, ռուսական բանակն օպերատիվ տիրույթում է հայտնվում, հարձակման հնարավորություն ունենալով ինչպես դեպի արեւելյան, այդպես էլ` հյուսիսային Դոնբասում ուկրաինական բոլոր պաշտպանական համակարգերի թիկունք: Առավել եւս, եթե ռուսները նաեւ լուծեն Չասով Յարի խնդիրը (Տե´ս https://iravunk.com/?p=301596&l=am) եւ այստեղին ընդառաջ հարձակում սկսեն: