Վրաստանի վարչապետը խոստացել է ուժ կիրառել, եթե նախագահն ինքնուրույն չհեռանա

Ամանորից հաշված օրեր առաջ Վրաստանում դեռ քաղաքական կրքերը շիկացման գագաթնակետին են:

Ինչպես հայտնի է, դեկտեմբերի 29-ին լրանում է Վրաստանի դեռ գործող նախագահի` ֆրանսուհի Զուրաբիշվիլու պաշտոնավարման ժամկետը: Նա էլ հայտարարում է, որ չի հեռանալու նախագահական նստավայրից:

Իսկ ահա Վրաստանի վարչապետը խոստացել է ուժ կիրառել, եթե նախագահն ինքնուրույն հրաժարական չտա։

Իրակլի Կոբախիձեն հիշեցրել է, որ Սալոմե Զուրաբիշվիլիին անհրաժեշտ է լքել նստավայրը դեկտեմբերի 29-ին։
Ավելի վաղ Սալոմե Զուրաբիշվիլին իր մտադրությունն էր հայտնել «փոխել ռեժիմը» ​​և նստել մինչև վերջ, եթե իշխող «Վրացական երազանք» կուսակցությունը չկարողանա համաձայնության գալ ընդդիմության հետ նոր խորհրդարանական ընտրություններ անցկացնելու վերաբերյալ։ Միայն թե անհասկանալի է մնում Զուրաբիշվիլու մոտեցումը: Իշխանությունն ու ընդդիմությունը համաձայնության կգան թե չեն գա, նոր ընտրություններ կնշանակեն, թե չեն նշանակի, առհասարակ, երկրում ինչ տեղի կունենա, այդ ամենն ի՞նչ կապ ունի Զուրաբիշվիլու հեռանալ-չհեռանալու հետ: Նրա լիազորությունենրի ժամկետը, անկախ Վրաստանի ներքին անցուդարձից, ավարտվում է դեկտեմբերի 29-ին, եւ այդ պահից նա այլեւս Վրաստանի նախագահ չէ: 

Իրականում, իհարկե, Զուրաբիշվիլին մի քիչ կաղմկի եւ կհեռանա, քաջ գիտակցելով, որ դրա այլընտրանքը բանտն է: Իրականությունն այն է, որ նրա միջոցով Արեւմուտքի կազմակերպած հեղաշրջումն այդպես էլ չիրականացավ: Կարող է իր հեռանալու շեմին, այնսինքն` վաղը եւս մեկ անգամ յուրայիններին փողոց հանել: Բայց մեկ է, վրացական հանրության լայն զանգվածներին այս անգամ չկարողացան խաբել ու փողոց հանել: Նոր փորձը եւս հազիվ թե այդ վիճակը փոխի: