Չինացի գիտնականները «ռոբոտ-կատու» են ստեղծել

Չինացի գիտնականներն արհեստական բանականությամբ ռոբոտ են ստեղծել,  որը կարող է ցածր ձգողության պայմաններում ցատկել աստերոիդների մակերևույթների վրայով։ Այս մասին գրում է South China Morning Post պարբերականը:

Խարբինի պոլիտեխնիկական համալսարանի գիտնականները, որոնք ոգեշնչվել են կատուների՝ օդում շրջվելու և մշտապես թաթերի վրա վայրէջք կատարելու ունակությունից, օգտագործել են արհեստական բանականության տեխնոլոգիա, որպեսզի ռոբոտին վարժեցնեն օդում՝ վերջույթների օգնությամբ, շտկել իր դիրքը:

Ըստ պարբերականի՝ ի տարբերություն ավանդական համակարգերի, որոնք ապավինում են ծանր մասնագիտացված կայունացնող սարքավորումներին, ստեղծված ռոբոտը չորս վերջույթների համակարգված շարժման համար օգտագործում է «առանց մոդելի» կառավարման համակարգը: Դա թույլ է տալիս ռոբոտին հարմարեցնել իր թեքությունը և օդում՝ տարածության մեջ, փոփոխել դիրքը:

Ավանդական անիվային ամենագնացները, որոնք օգտագործվում են Լուսնի և Մարսի վրա, փոքր երկնային մարմինների վրա՝ ցածր ձգողության պայմաններում դժվարություններ են ունենում՝ անիվների արդյունավետ աշխատանքի համար անբավարար ձգողականության պատճառով: Ցատկող ռոբոտները կարող են լուծել այս խնդիրը:

South China Morning Post-ը նշում է, որ փոքր երկնային մարմինները ոչ միայն պարունակում են Արեգակնային համակարգի ծագումը հասկանալու բանալին, այլև հարուստ են այնպիսի ռեսուրսներով, ինչպիսիք են պլատինը և այլ հազվագյուտ մետաղները: