700 000 –1 000 000 դրամ․ Ինչ արժե ամանորյա հանգիստը Հայաստանում․ Շոկային թվեր

20 Դեկտեմբեր, 2024 16:08

Նոր տարին այն տոնն է, երբ ցանկանում ես մի կողմ թողնել բոլոր հոգսերը և սուզվել զվարճանքի, ջերմության ու կախարդանքի մթնոլորտում: Ոմանք նախընտրում են այն դիմավորել տանը, տոնական ուտելիքներով առատ սեղանի շուրջ։ Իսկ ոմանք էլ ցանկանում են տոնական հագուստ կրել ու Ամանորը նշել տոնական ու աղմկոտ մթնոլորտում։ Շատերը փորձելու են փախչել հայկական ավանդական «գաստրոտեռորից»՝ տոլմա-բուդ-նրբաբլիթից, ավելի հասկանալի՝ բլինչիկից։

Բայց որքանո՞վ է ամանորյա փախուստը մատչելի փախչել ցանկացողների համար։ Ամանորին ընդառաջ հյուրանոցները փաթեթներ են մշակել, որոնք կրկնակի կամ եռակի թանկ են՝ տարվա մյուս օրերին ներկայացվող առաջարկներից։

Եվ այսպես՝ ի՞նչ կարժենա հանգիստը Նոր տարվա երեք օրերին՝ դեկտեմբերի 31-ից հունվարի 2-ը ներառյալ երկու անձի համար։

Օրինակ, Ծաղկաձորի 2–3–աստղանի հյուրանոցներում դեկտեմբերի 31–ից հունվարի 3–ը երկու անձի համար ամանորյա փաթեթի գինը տատանվում է 250 000–300 000 դրամի սահմանում։ Այս գները ներառում են գալա ընթրիք, ամանորյա շոու ծրագիր, ինչպես նաև մեկանգամյա կամ 2-անգամյա սնունդ։ Ավելի բարձրակարգ` 4-5 աստղանի հյուրանոցներում գները 400 000–700 000 դրամ են։ Թանկ հյուրանոցներում դեռևս ազատ տեղեր կան, բայց արդեն սահմանափակ թվով։ Ծաղկաձորում կան 4-5–աստղանի այնպիսի հյուրանոցներ, որոնք 3–օրյա փաթեթներ չունեն, միայն 5 և 6–օրյա են առաջարկում, ու արժեքը տատանվում է 700 000 –1 000 000 դրամի սահմաններում։ Գնում ներառված է ամանորյա գալա ընթրիք, միայն նախաճաշ և լողավազանից ու սպա սրահներից օգտվելու հնարավորություն։

Դիլիջանի 3–աստղանի հյուրանոցներում Նոր տարվա փաթեթները սկսվում են 300 000 դրամից և հասնում 450 000 դրամի։ 4-5–աստղանի հյուրանոցներում գներն ավելի բարձր են, ինչպես մյուս քաղաքներում, հասնում են 550 000-600 000 դրամի։ Այստեղ բոլոր տիպի հյուրանոցներում հիմնականում ազատ են մնացել առանց պատշգամբների, մեկտեղանոց կամ երեքտեղանոց սենյակները։

Աղվերանում հիմնականում 4–աստղանի հյուրանոցներ են, որտեղ ամանորյա ծառայությունների վճարը սկսվում է 280 000 դրամից և հասնում 320 000 դրամի։ 5–աստղանի հյուրանոցներում փաթեթի գինը 2 անձի համար 650 000-720 000 դրամ է։ Աղվերանի որոշ հյուրանոցներում հունվարի 2-ին խաշի կամ հարիսայի հյուրասիրություն է լինում։

Գյումրիում էլ կան 4-5 աստղանի հյուրանոցներ, որտեղ եռօրյա հանգիստը 2 անձի համար (գալա ընթրիքը ներառյալ) սկսվում է 250 000 դրամից։ Որոշ դեպքերում էլ գները հասնում են 400 000-450 000 դրամի, բայց գնի մեջ չի ներառվում գալա ընթրիքը, փոխարենը կա նախաճաշ։

Հիշեցնենք, որ զբոսաշրջության կոմիտեի տվյալներով՝ 2024 թվականի տասը ամսվա ընթացքում Հայաստան է այցելել 1 926 405 զբոսաշրջիկ, որոնց 43%-ը կամ 828,6 հազարը Ռուսաստանից ժամանած այցելուներն են։