Никол просил передать тебе большой привет

Մինչ համացանցում ակտիվորեն քննարկում են, որ Նիկոլ Փաշինյանի հետ համատեղ ապրող կնոջ՝ Աննա Հակոբյանի օգնական Ստելա Սարուխանյանի գլխին երկաթե ջահ է ընկել, ու նա ուղեղի ցնցում է ստացել, ինչի մասին հենց ինքն էլ հրապարակում է արել, պարզվում է՝ ավելի վատ վիճակում է հայտնվել Հնդկաստանում մի փիղ, ում վրա ո՛չ ավել, ո՛չ պակաս ԱԺ նախագահ Ալեն Սիմոնյանն է «ընկել»: Առհասարակ, թե ինչ է կատարվում ներքաղաքական դաշտում, հիշեցնում է սովետական հայտնի «38 կապիկ» մուլտֆիլմը: Ինչ խոսք, ամեն ինչ շատ զվարճալի կլիներ, եթե այսքան ողբերգական չլիներ:

Եթե կարծում եք, թե վերոնշյալը հումորի ժանրից է, ապա՝ ո՛չ, իրականում Աննա Հակոբյանի օգնականի ուղեղը ցնցված է, Ալենն էլ Հնդկաստանում փիղ է քշում, ճակատին նշան արած նկարվում է ու պարում: Ընդ որում՝ ԱԺ նախագահն իրեն դրել է Ջիմիի տեղը ճիշտ այն պահին, երբ Ալիեւը նոր հոխորտանքներ ու սպառնալիքներ է հղում Հայաստանին, երբ Բաքվում շարունակում է գերեվարված մնալ Արցախի ռազմաքաղաքական ղեկավարությունը, երբ աշխարհաքաղաքական իրավիճակը՝ Սիրիիայից մինչեւ Վրաստան, հուշում են, որ բոլորովին հնդկական կայֆերի ժամանակը չէ:

«Իլհամ Ալիեւի հայտարարությունների օրը ՀՀ Ազգային ժողովի նախագահ Ալեն Սիմոնյանը լուսանկար է հրապարակել Հնդկաստան կատարած իր «աշխատանքային» այցելությունից։ Ցինիզմի եւ վարչապետ դառնալու հավակնությունների իմաստով Աննա Հակոբյանն ունի միայն մեկ մրցակից», - գրել է Լեհաստանում ՀՀ նախկին դեսպան, ՍԴ աշխատակազմի նախկին ղեկավար Էդգար Ղազարյանը։

ԳՆԱՑԵԼ ԷԻՆ ԽՆԴՐԵԻՆ, ՈՐ «ՌԱՄԸ ՄԵԶ ՕԳՆԱԿԱՆ» ԼԻՆԻ՞

Իսկ թե ովքեր են Հնդկաստան մեկնել Ալեն Սիմոնյանի հետ ՀՀ քաղաքացիների հաշվին եւ պետբյուջեի միջոցներով, ոչ պակաս ուշագրավ է: Դե, իհարկե, Ալենի պատվիրակության կազմում պետք է լիներ ԱԺ աշխատակազմի հասարակայնության հետ կապերի եւ հաղորդակցության վարչության լրատվության արտադրության բաժնի լուսանկարիչ -օպերատորը եւ նույն բաժնի հեռուստաօպերատրը, որ կարեւորը՝ ֆոտոսեսիաներն ու ռիլերը (կարճ տեսանյութեր) սիրուն ստացվեն: Նրանց հետ Հնդկաստան են մեկնել նաեւ ՔՊ-ական պատգամավորներ Արեն Մկրտչյանը, Լիլիթ Ստեփանյանը, Սիսակ Գաբրիելյանը, Ալենի խորհրդականը, մամուլի քարտուղարը, ԱԺ երկու վարչության պետեր եւ աշխատազմի արարողակարգի վարչության այցերի եւ ընդունելությունների կազմակերպման բաժնի առաջատար մասնագետ: Ո՞րն է այս այցի ՕԳԳ-ն՝ օգտակար գործողության գործակիցը, ինչ խոսք, մի հուզիչ արդարացում կգտնվի, օրինակ, որ գնացել էին խնդրեին, որ հնդկական աստվածներից «Ռամը մեզ օգնական» լինի:

ԱՍԵՔ, ՉԱՍԵՔ, ԻՆՉ ՈՒԶՈՒՄ, ԱՅՆ ԷԼ ԱՐԵԼ ԵՆ ՈՒ ԱՆԵԼՈՒ ԵՆ

Ի տարբերություն Ալեն Սիմոնյանի՝ Երեւանի քաղաքապետ Տիգրան Ավինյանի օրն օր չի: Կայացավ Երեւանի ներկա ու նախկին քաղաքապետներ Ավինյանի ու Մարությանի բանավեճը՝ տրանսպորտի թանկացման շուրջ: Ընդ որում՝ մեկ ժամ, 40 րոպե տեւած բանավեճը, եթե ամփոփենք կարճ, ապա նույնն էր, ինչ Հայկ Մարությանի հայտնի սկեչերից մեկը «Կարգին հաղորդման» մեջ: Երկու աշխատակից սկսում են իրար վիրավորել՝ բոշա-փչացած, բոշա-փչացած… Տնօրենը վերջում գալիս է ու ասում՝ մի կռվեք, երկուսդ էլ ճիշտ եք: Իհարկե, այս դեպքում վերջում ո՛չ Փաշինյան Նիկոլը եկավ, ո՛չ էն աշխարհից Սորոսը, եւ ո՛չ էլ դեսպանատներից զանգեցին, բայց դերասանական ունակություններով ու տարօրինակ միմիկաներով Ավինյանը հաստատ չզիջեց Մարությանին:

Իսկ այն, ինչ պետք է իմանալ այդ բանավեճից, այն է, որ Տիգրան Ավինյանի Լոս Անջելես մեկնելու տոմսն արժեցել է 7 միլիոն 650 հազար դրամ:

«Երեւանի 43 շենքի բնակիչ գույքահարկ է տվել, որ Ավինյանը գնա Լոս», - ասաց Մարությանը՝ ներկայացնելով ծախսերի թուղթը: Նա նաեւ նշեց, որ 2026 թ. 20 մլրդ դրամ ավելի գույքահարկ է հավաքվելու, հետեւապես՝ հանգիստ կարող է առանց թանկանալու էլ աշխատել տրանսպորտը:

«Երեւանի քաղաքապետ Տիգրան Ավինյանն, ի վերջո որեւէ հոդաբաշխ բացատրություն չտվեց Հայկ Մարությանի այն հարցին, թե ինչո՞ւ է հանրային միջոցների հաշվին, միայն իր համար 20 հազար ԱՄՆ դոլարով գնել դեպի Լոս Անջելես թռիչքի բիզնես կարգի ավիատոմս եւ մինչեւ պաշտոնատար անձ դառնալն արդյո՞ք իր գրպանից երբեւէ նման գնով ավիատոմս ձեռք բերել է, թե՝ ոչ։ Ավինյանը հիստերիկ հակադարձումից զատ, ոչինչ չունեցավ ասելու ու չէր էլ կարող ասել, քանի որ մինչեւ պետական պաշտոն ստանալը՝ նա այդքան գումար նույնիսկ չի տեսել, իսկ նորմալ երկրում պաշտոնյան միայն իր այդ արարքի համար հրաժարական կտար եւ կհեռանար, ավելին՝ կարող էր նաեւ քրեական պատասխանատվության ենթարկվել պետական ունեցվածքի վատնման համար, ….բայց դա նորմալ երկրում», - արձանագրում է փաստաբան Րաֆֆի Ասլանյանը։

Ինչ վերաբերում է նրան, որ Ավինյան Տիկոն իր նախընտրական քարոզարշավի ժամանակ չէր ասել, թե տրանսպորտը թանկացնելու է, վերջինս ուղիղ ակնարկեց, որ իրենց «Ասեք, կանենք» կարգախոսն այլեւս մնացել է անցյալում:

«Մարդիկ մեզ չեն ընտրել նրա համար, որ մենք ամեն անգամ գնանք ասենք՝ սիրելի ժողովուրդ, դուք ո՞նց եք կարծում, ես այս որոշումն ընդունեմ, թե՝ չընդունեմ», - ինքնագոհ հայտարարեց՝ մայրաքաղաքում 9 տոկոս ընտրող ունեցող Ավինյանը: Այնպես որ, ասեք, չասեք, ինչ ուզում, այն էլ արել են ու անելու են «ժողբաստիոնում»:

ՀԱՆՈՒՆ ՆԱԽԸՆՏՐԱԿԱՆ ՔԱՐՈԶԱՐՇԱՎԻ՝ ԱՎԻՆՅԱՆԻՆ «ԿԶՈՀԱԲԵՐԵ՞Ն»

Ի դեպ, ասացինք թանկացում, հիշեցինք մեկ այլ թանկացման մասին: Երեկ ՀՀ վարչական դատարանի կողմից կայացվել է որոշում, որով Երեւանի ավագանու կողմից ընդունված եւ այս տարվա հունվարի 1-ից Երեւանի ավտոկայանատեղիներում կայանելու համար սահմանաված դրույքաչափերը սահմանելու որոշումն անվավեր է ճանաչվել։

Այնպես որ, չի բացառվում, որ վաղն էլ տրանսպորտի թանկացումը չեղարկվի եւ Ավինյանին հանրության աչքի առաջ «փչացնելու» ֆոնին՝ Նիկոլ-Աննա զույգը կկառուցի իր նախընտրական քարոզարշավը: Այս մասին է վկայում նաեւ այն, որ Ավինյանը բանավեճի ժամանակ այդպես էլ խուսափեց պատասխանել հարցին, թե Փաշինյան Նիկոլը տեղյա՞կ է տրանսպորտի թանկացումից: Պարզ է չէ՞, որ ըստ իրավիճակի, Փաշինյանը կարող է միամիտ իջեւանցու դեմք ընդունել ու ասել՝ թե բա ես տեղյակ չէի: Սա եւս լավագույնս կարող է օկտագործել նախընտրական քարոզարշավի ժամանակ, իսկ այն, որ նախընտրական տրամադրություններ են ոչ միայն նրանց մոտ, ցույց է տալիս մի շարք կարեւոր հարցերում որեւէ տեսակետ չարտահայտած, բայց հիմա աշխուժություն դրսեւորող պսեւդո «ընդդիմադիրները»: Նույն Հայկ Մարությանի ակտիվությունն էլ է այդ մասին փաստում եւ ընդհանրապես՝ ներքաղաքական դաշտում պոպուլիզմի «պերեդոզը» ամբողջովին տեղավորվում է դե ֆակտո մեկնարկած արտահերթ կամ հերթական խորհրդարանական ընտրությունների քարոզարշավի մեջ: Եվ երբ քաղաքացիները հարցնում են, թե ո՞վ հաղթեց Մարության-Ավինյան բանավեճում, մնում է ասել՝ նիկոլականները դուրս եկան նիկոլականների դեմ եւ երկու կողմն էլ պարտություն կրեցին: Չէ՛, բարոյական հաղթանակ էլ չկար, բարոյական հաղթանակ կլիներ այն ժամանակ, երբ նրանք գոնե Արցախի հանձնումից հետո՝ չթելեին Նիկոլի թելը:

«Ըստ իս, հայրենադավ սրիկաների կողմից կազմակերպված «2026 թվականի ընտրություններին» մասնակցությունը դա հին կոլաբորացիոնիզմի նոր ձեւաչափ է, որը մեկ անգամ եւս հաստատում է, որ ընդդիմադիր դաշտը օկուպացրած «ընդդիմադիրներին»` բացի իշխանության ղեկից, այլ բան չի հետաքրքրում», - այսպես է քաղաքական դիագնոզը ներկայացնում «Մեկ առողջություն» կոալիցիայի ղեկավար, 44-օրյա պատերազմի մասնակից Գրիգոր Գրիգորյանը:

ՀՐԱՆՏ ՍԱՐԱՖՅԱՆ