Որդիս այդ ծանր բեռը իր վրա է վերցրել․Աղազարյանը բացահայտում է որդու աշխատանքից ազատման իրական պատճառը

Ժամեր առաջ հայտնի դարձավ,  Էկոնոմիկայի նախարար Գեւորգ Պապոյանի ձեռքով պաշտոնանկ է արվել  ՔՊ-ից սկանդալով  հեռացված Հովիկ Աղազարյանի որդին՝ Հովսեփ Աղազարյանը: Հովսեփ Աղազարյանն արդեն մեկ տարի է՝ աշխատում էր  Էկոնոմիկայի նախարարության գործերի կառավարման վարչությունում՝ որպես պետի խորհրդական: Ա Նախարարությունից  Հովսեփ  Աղազարյանի մասին խոսողներն ընդգծում են, որ իրեն բավականին ամուր ու ինքնավստահ էր զգում  ՔՊ-ական պատգամավորի որդին նախարարությունում,  պատշաճ ներկայանում էր գործի և  ամեն առավոտ օրն սկսում էր նախարարությունում սկսած նորոգման աշխատնքները  ստուգելով: շուրջ 1000 դոլար աշտավարձ + հավելավճար ու պարգևավճարով նախարարությունում ճգնող Հովսեփ Աղազարյանին, ասում են,  վերապահված է եղել լայն լիազորություններ՝ ընդ որում ոչ միայն նախարարության  ներքին հարդարման աշատանքների վերահսկման , այլև ներքին մի շարք հարցերի կարգավորման մասով:

Վերը նշվածի վերաբերյալ եւ ոչ միայն զրուցել ենք անկախ պատգամավոր ՀՈՎԻԿ ԱՂԱԶԱՐՅԱՆԻ հետ, ով հերքեց տարածված տեղեկատվությունն այն մասին, թե որդուն ստիպել են ազատվել աշխատանքից․

-Որդիս ինքն է դիմում գրել եւ ազատվել աշխատանքից, որովհետեւ արդեն երեք ամիս իմ կինը, իր մայրը խնամքի կարիք ունի, որդիս այդ ծանր բեռը իր վրա է վերցրել։ Կինս, ցավոք, այս պահին ամենվարկյանի, րոպեի խնամքի կարիք ունի։ Լուրջ առողջական խնդիրներ ունի կինս։

Այնպես որդուս աշխատանքից ազատվելը ես չեմ կապում իմ շուրջ տեղի ունեցող զարգացումների հետ, որովհետեւ նորից եմ կրկնում արդեն երեք ամիս ինչ ծանր հիվանդություն է հայտնաբերվել կնոջս մոտ, պետք է մեկը լիներ, որ անընդհատ զբաղվեր կնոջս առողջականով։ Նախ արձակուրդ վերցրեց, սակայն դա չբավարերեց,  հիմա էլ ստիպված դիմեց այդ քայլին, սա է իրականությունը։

-Պարոն Աղազարյան, այս իրողություններից հետո, մասնավորապես համացանցում տարածված Ձեր նամակագրություններից հետո, արդյո՞ք Ձեր ընտանիքը Ձեր կողքին է, Ձեզ սատարում է։

-Միանշանակ իմ ընտանիքը ինձ աջակցում է ինչ վերաբերում է նամակագրություններին, ապա ես վերականգնել եմ իմ ֆեյսբուքյան էջը եւ տեսա, որ թիրախային որոշ նամակագրություններ ուղղակի անհետացել են, որոնք հնարավոր է սերիա-սերիա հրապարակվեն։ Բայց այդ նամակագրությունները, եթե ամբողջությամբ հրապարակվեն եւ հենց ամբողջությամբ ներկայացվեին վարչապետին, ապա վստահ եմ, որ վարչապետը չէր հավատա այն ֆարսին, որը նրան հրամցրեցին։ Այնպես որ հիմա թող ինչ կարող են հրապարակեն կոնտեքստից դուրս, հատվածային, որովհետեւ ես խնդիր չունեմ, ես գիտեմ թե ինչ է եղել իրականում։ Նման խոցելի հնարավոր նամակագրությունների հրապարակման մասին ես իմ ընտանիքին նախապես պատմել եմ, իմ ընտանիքը, իմ որդիները վստահ են, որ իրենց հայրը որեւէ պետական դավաճանություն կամ այլ պախարակելի ոչինչ չի արել։

-Պարոն Աղազարյան, 2018-ին, երբ մասնակցում էիք իշխանափոխության գործընթացին կհավատայի՞ք, որ մի օր այդ նույն ընկերների կողմից հարված կստանաք թիկունքից։

-Ես հարվածներ չեմ  ստացել իմ այն ընկերներից, որոնց հետ 2018-ին անքուն գիշերներ եմ անցկացրել, ինձ թիկունքից հարված հասցրեցին Հռոմի պապից էլ ավելի կաթոլիկ ձեւացող նորելուկ ՔՊ-ականներից։ Նրանք վարչապետի նկատմամբ հավատարմությունը ի ցույց դնելու համար ոչ մի բանի առաջ կանգ չեն առնում, նրանց համար արժեքներ գոյություն չունեն։ Ես նրանց նմանների դեմ պայքարել եմ տարիներ ի վեր, ափսոսում եմ, որ չեմ հաջողել փաստացի։ Ես միշտ կողմ եմ եղել, որ վարչապետը լսի միայն իր սրտին ոչ թե կեղծ հավատարիմներին, դե հիմա ունենք այն ինչ ունենք, ինչ արած։

-Չե՞ք փորձել հանդիպել Փաշինյանին այս ամենից հետո։

- Իմ նախաձեռնությամբ ես վարչապետի հետ հանդիպել եմ տարիուկես առաջ մեկ անգամ, դրանից հետո ես որեւէ նախաձեռնություն չեմ ցուցաբերել վարչապետի հետ հանդիպելու ։ Եթե վարչապետին անհրաժեշտ է ինձ հետ հանդիպել, սիրով, բայց ինքս նպատակահարմար չեմ գտնում իմ նախաձեռնությամբ հանդիպել նրա հետ։  Ես չեմ նեղվում իմ գործընկներների վերաբերմունքից, ոչինչ իրենք իրենց համարում են հավատացյալ, բայց դեմ են գնում քրիստոնեական արժեքներին։ Ես ինձ հավատացյալ չեմ համարում, բայց այդ արժեքները պահպանում եմ։ Թող լավ իմանան, այն ինչ արեցին ինձ հետ, մի օր թակելու է իրենց դուռը։