Գիտնականները հայտնաբերել են կապ անհանգիստ քնի ու թուլամտության միջև

Կալիֆոռնիայի համալսարանի գիտնականները պարզել են, որ մարդիկ, ովքեր անհանգիստ են քնում ու հաճախ են շաժվում քնի ընթացքում, ավելի վատ ցուցանիշներ են գրանցում ճանաչողական թեստեր անցնելիս։ Գիտնականների հետազոտության արդյունքները հրապարակվել են Neurology ամսագրում։

Հետազոտությանը մասնակցել է 30-40 տարեկան 526 մարդ։ Հատուկ հսկիչ թևնոցների միջոցով գիտնականները հավաքագրել են տեղեկություներ կամավորների գիշերային քնի տևողության ու որակի, ինչպես նաև քնի ընթացքում նրանց ակտիվ շարժումների մասին, ինչից հետո խնդրել են մասնակիցներին կոգնիտիվ կարողությունները ստուգող թեստեր անցնել։

Կամավորները պետք է որոշակի խմբին պատկանող հնարավորինս շատ բառեր ասեին (օրինակ՝ կենդանիների տեսակներ), որոնք բոլորը պետք է միևնույն տառով սկսվեին։ Արդյունքում հետազոտությունը ցույց է տվել, որ անհանգիստ քուն ունեցող մարդիկ 2,5 անգամ ավելի հաճախ էին թեստավորման ընթացքում վատ արդյունք գրանցում, քան այն մարդիկ, որոնք անշարժ են քնում։

Ինչպես բացատրել է հետազոտության առաջատար հեղինակ Յուե Լենգը, ով ուսումնասիրում է քնի ու գլխուղեղի առողջության միջև կապը, գիշերային քնի որակը շատ ավելի կարևոր է, քան դրա տևողությունը։ Ամենայն հավանականությամբ, անհանգիստ քունը հանգեցնում է գլխուղեղի՝ տոքսիկ սպիտակուցներից ինքնամաքրվելու կարողության վատթարացման, իսկ այդ սպիտակուցների կուտակումը հանգեցնում է Ալցհեյմերի հիվանդության զարգացման։