Հայաստանը չեխովյան միջազգային փառատոնին կմասնակցի «Փող, կիրք, իշխանություն» ներկայացմամբ

Մոսկվայում 2025 թվականի մայիսի 23-ից հուլիսի 25-ը տեղի կունենա Անտոն Չեխովի անվան 17-րդ միջազգային թատերական փառատոնը: Նախատեսվում է շուրջ 14 ներկայացման ցուցադրություն՝ 12 երկրից, այդ թվում՝ մինչեւ անգամ Բահրեյնից ու Լիբանանից: Այս մասին փառատոնի կազմակերպիչները եւ մասնակիցները ազդարարեցին միասին՝ ռուսաստանյան ՏԱՍՍ պետական լրատվական գործակալությունում հրավիրված մամլո ասուլիսի ժամանակ:

Նշենք, որ Հայաստանն այս փառատոնին մասնակցելու է «Փող, կիրք, իշխանություն» ներկայացմամբ, որը բեմադրել է Կ. Ստանիսլավսկու անվան ռուսական պետական դրամատիկական թատրոնի տնօրեն, ռեժիսոր ՍՈՒՐԵՆ ՇԱՀՎԵՐԴՅԱՆԸ: Ի դեպ, նա այս փառատոնին նորեկ չէ, ինչի մասին բարձրաձայնեց ասուլիսին:

«Շնորհակալ եմ կազմակերպիչներին, որ առաջին անգամ չեմ ներկայացնում իմ բեմադրությունները չեխովյան փառատոնին: Շատ տարիներ առաջ փառատոնի երիտասարդական ծրագրին մասնակցել է իմ «Փսիխոզ-448» ներկայացումը։ Բայց հիմա հատկապես շնորհակալ եմ, որ արդեն գրեթե մեկ տարի լինելով Երեւանի Կ. Ստանիսլավսկու անվան ռուսական դրամատիկական թատրոնի ղեկավարը, ներկայացնելու եմ «Փող, կիրք, իշխանություն» ներկայացումը, որն իմ վերջին աշխատանքն է: Այն Իվան Գոնչարովի «Սովորական պատմություն» վեպի հիման վրա է բեմադրված», - նշեց Շահվերդյանը։

Թե ինչու է անդրադարձել այս գործին եւ ինչու պիեսը «Սովորական պատմություն»-ից դարձավ «Փող, կիրք, իշխանություն», ռեժիսորն այսպես մեկնաբանեց. «Այսօր մեզ հատկապես փողն ու իշխանությունն է փչացնում: Իմ գլխավոր հերոսը Պյոտր Ադուեւն է, նա աղբի վերամշակման մագնատ է։ Նա մի քանի գործարան ունի ամբողջ աշխարհում եւ զբաղվում է աղբի վերամշակմամբ։ Նրա եղբոր որդին՝ գավառացի Ալեքսանդր Ադուեւը, տեղափոխվում է նրա մոտ եւ աստիճանաբար փչանում է։ Պիեսում ինձ համար մի շատ կարեւոր արտահայտություն կա, որը Դոստոեւսկու խոսքերն են՝ «Եթե Աստված չկա, ուրեմն՝ ամեն ինչ թույլատրված է»։ Ներկայացման սկզբում Պյոտր Ադուեւը խոսում է այս մասին, սա իր սիրելի մեջբերումն է: Հետո նրա զարմիկն է կրկնում այդ արտահայտությունը: Ինձ համար այս ներկայացման գլխավոր ուղերձն այն է, որ մենք ինչ-որ կերպ մոռացել ենք, որ բոլորս Աստծո ներքո ենք եւ անում ենք այն, ինչ չպետք է անել: Միշտ պետք է հիշել, որ բոլորս Աստծո ներքո ենք եւ ինչ-որ տեղ, ինչ-որ կերպ կպատժվենք մեր արարքների պատճառով»:

Սուրեն Շահվերդյանը ամփոփելով խոսքը՝ շնորհակալություն հայտնեց Ռուսաստանի Դաշնության մշակույթի նախարարությանը, «Ռուսական սեզոններ»-ին, որն աջակցել է իրենց՝ բեմադրելու ներկայացումը։

«Չեխովյան փառատոնը խոսում է աշխարհի տարբեր ժողովուրդների անունից եւ, միեւնույն ժամանակ, դիմում է ընդհանուր առմամբ՝ ողջ աշխարհին՝  ներկայացնելով մարդկության գեղարվեստական ​​հատկությունների, ​​որոնումների ընդհանրությունը: Փառատոնը փորձում է հասնել նրան, որ այս համայնքը լինի», - ընդգծեց Ա.Պ. Չեխովի անվան միջազգային թատերական փառատոնի հիմնադիր, թատերագետ ԱԼԵՔՍԵՅ ԲԱՐՏՈՇԵՎԻՉԸ։

ՀՐԱՆՏ ՍԱՐԱՖՅԱՆ