Տրամադրության բարելավումն օգնում է նվազեցնել աղիներում բորբոքային գործընթացների մակարդակը․ հետազոտություն

Բժշկական միջամտությամբ տրամադրութունը բարձրացնելը (հոգեթերապիա, հակադեպրեսանտներ, ֆիզիկական ակտիվություն) կարող է նվազեցնել Կրոնի հիվանդությունով ու խոցային կոլիտով հիվանդների մոտ բորբոքումների մակարդակը։ Այս մասին են վկայում Ebiomedicine ամսագրում հրապարակված հետազոտության արդյունքները։

Աղիների բորբոքային հիվանդությունների շարքին են դասվում Կրոնի հիվանդությունն ու խոցային կոլիտը։ Դրանք աղեստամոքսային տրակտի քրոնիկ աուտոիմունային բորբոքումներ են, որոնց ախտանշաններից են որովայնի ցավերը, փորլուծությունը, հոգնածությունն ու էնկոպրեզը (կղանքի անպահություն)։ Այս ամենը հանգեցնում է տրամադրության ակնհայտ անկման և առհասարակ հոգեկան խնդիրների զարգացման։

Գիտնականներն ուսումնասիրել են 15 հազար հետազոտության տվյալները, որոնցում գնահատվել է տրամադրության բարելավմանն ուղղված միջոցների ազդեցությունը աղիների բորբոքային հիվանդություններով հիվանդների մոտ բորբոքային կենսամարկերների վրա։ Գիտական աշխատանքի հեղինակներն առանձնացրել են նմանատիպ սխեմաներ ունեցող առավել որակյալ գիտափորձերից 28-ը, որոնց մասնակցել է ավելի քան 1700 մարդ։

Հետազոտությունները ցույց են տվել, որ հոգեթերապիայի, այդ թվում ճանաչողավարքային թերապիայի դեպքում բորբոքման մակարդակն ավելի շատ է նվազում՝ համեմատած հակադեպրեսանտների և մարզումների հետ: Սակայն ընդհանուր առմամբ այս բոլոր միջոցներն էլ համարվում են արդյունավետ։ Գտական աշխատանքն ապացուցել է, որ այս մեթոդն օգնում է նվազեցնել աղիքային բորբոքման մակարդակը միջինում 18%-ով։