Այդպիսի անհեթեթությանն ի՞նչ պատասխան տաս. Վազգեն Սաֆարյան

Վրաստանի նախագահի աթոռը զբաղեցնող Սալոմե Զուրաբիշվիլիի պաշտոնական էջում տեղադրված Լոռվա պատկանելության հարցը խեղաթյուրող հայտարարությունը ալեկոծել էր ՀՀ հասարակությանը կամ գոնե դրա առողջ հատվածին։ Սակայն այս ողջ պատմության մեջ ուշագրավն այն էր, որ այդ նույն ալեկոծումը՝ ազգային սոուսով, չբարձրացավ այն ժամանակ, երբ աշխարհաքաղաքական կոնյուկտուրայով պայմանավորված՝ անվանափոխվում էր Լոռին Մայր Հայրենիքի գիրկը վերադարձնողի՝ ծնունդով շուշեցի պետական գործիչ, հրապարակախոս, Կոմունիստական կուսակցության անդամ Սարգիս Կասյանի անվան փողոցը, ինչի վերաբերյալ դիտարկում էր արել ՝ ԵՊՀ միջազգային հարաբերությունների եւ դիվանագիտության ամբիոնի դոցենտ, միջազգայնագետ Գրիգոր Բալասանյանը: Անդրադառնալով վերոնշյալին՝ «Իրավունք»-ը զրուցել է Հայաստանի Առաջադիմական միացյալ կոմունիստական կուսակցության նախագահ ՎԱԶԳԵՆ ՍԱՖԱՐՅԱՆԻ հետ:

— Իհարկե, բացասական եմ վերաբերվում այս ամենին: Ո՞վ կարող է այդ ամենին ինչ-որ դրական գնահատական տալ: Դա պարզապես ցնդաբանություն է: Ոչ մեկն այդ ամենը լուրջ չի ընդունում, որովհետեւ իրենք, պարզապես չգիտեմ, թե ում պատվերն են կատարում, որ նման բան են անում: Իրենք 2020 թվականին լավ էլ պատժվել են դրա համար: Ինչ վերաբերում է Լոռիին, այն ե՞րբ է եղել վրացական: Մեկ վրացի ապրու՞մ է Լոռիում: Ես դա այնքան անհեթեթ եմ համարում, որ նույնիսկ չեմ ուզում այդ ամենի մասին խոսել, որովհետեւ, երբ խոսում ես, նշանակում է, որ ինքդ մեծ կարեւորություն ես տալիս այդ մտքին: Այսինքն` այդ մտքին կենդանություն ես տալիս հենց ինքդ՝ դրա մասին խոսելով: 
Այդպիսի անհեթեթությանն ի՞նչ պատասխան տաս: Իմաստ չունեցող բան են ասել: Պարզապես, այս իշխանությունների կողմից պետք է արտգործնախարարի մակարդակով շատ կոշտ գնահատական տրվեր ասվածին: Այն միակ ճանապարհն է, որով մենք կապվում ենք աշխարհի հետ (Ռուսաստանի հետ՝ հատկապես): Այդ ճանապարհով են մեր բեռները գալիս: Հենց դրա համար էլ ձայն չեն հանում: Դեռ մենք չենք ասում Ախալքալաքի մասին: Պետք է խոսել նաեւ Ախալքալաքի, Ջավախքի մասին, թե այդ ինչպես եղավ, որ Ջավախքում մեծ մասը հայեր են ապրում:

ԴԻԱՆԱ ՄԱՆՈՒԿՅԱՆ