Աբխազիայում կտրուկ սրվել է ներքին իրավիճակը (Տեսանյութ)

Աբխազիայում կտրուկ սրվել է ներքին իրավիճակը: Սուխումում ընդդիմության կողմնակիցները բեռնատարով քանդել են կառավարական համալիրի շուրջ պարիսպը, ներխուժել դրա տարածք, ինչպես նաև պատուհանների միջով մտել խորհրդարան և նախագահի աշխատակազմ։ Տուժել է ինը մարդ։ Դժգոհության պատճառն այն էր, որ պատգամավորները նախատեսում էին վավերացնել Ռուսաստանի Դաշնության հետ ներդրումային համագործակցության մասին համաձայնագրերը, որի հետ կապված մի քանի օր շարունակ աբխազական ընդդիմադիրները բողոքի ակցիաներ են ծավալում։

Աբխազիայի նախագահ Ասլան Բժանիային գաղտնի տարհանել են նախագահական պալատից։ Ըստ աղբյուրի. «Մինչ նրա անվտանգության պետը շեղեց ամբոխը և սկսեց բանակցություններ վարել, Բժանիայի թիկնապահները նրան տարան ստորգետնյա անցումով, ապա մեքենայով: Այս պահին նա գտնվում է հսկողության տակ՝ Սուրկովի և Մոսկվայից ու Ստամբուլից որոշ մարդկանց հետ խորհրդակցելուց հետո: Բժանիան որոշում է կայացրել հետ կանչել վիճահարույց օրինագիծը խորհրդարանից և ինքն արձակել խորհրդարանը։  Նա կարող է հեռանալ Աբխազիայից ուղղաթիռով, որոնք գտնվում են գաղտնի վայրում և սպասում են հնարավոր տարհանմանը Սոչի: Սակայն Կրեմլը չի ​​մասնակցում դրան»։

Այլ աղբյուրների էլ պնդում են, որ Աբխազիայի ղեկավարը համաձայնել է հրաժարական տալ։ Ըստ այդմ, որ Աբխազիայի նախագահ Ասլան Բժանիան ցուցարարների նախաձեռնող խմբի հետ հանդիպման ժամանակ համաձայնել է պաշտոնը լքելու առաջարկին։ Բժանիան միայն խնդրել է Հանրապետության Նախագահի պաշտոնակատար նշանակել ներկայիս փոխնախագահը Բադրու Գյունբային։ Սակայն ցուցարարները համաձայն չեն սրա հետ և պահանջում են նախագահական ողջ թիմի (այդ թվում՝ Աբխազիայի փոխնախագահի և վարչապետի) հրաժարականը։ Իսկ մինչ արտահերթ նախագահական ընտրությունների անցկացումը ընդդիմությունն առաջարկեց հանրապետության ղեկավարի պարտականությունները վստահել խորհրդարանի խոսնակ Լաշա Աշուբային։

Միաժամանակ, Աբխազիայի խորհրդարանը գրաված ցուցարարները, շենքը հետ գրավելու անվտանգության ուժերի հնարավոր փորձի մասին լուրերի ֆոնին, պատրաստվում են պաշտպանվել և բարիկադներ են կանգնեցնում դրա դիմաց։

ՌԴ ԱԳՆ-ն մտահոգված է, որ Աբխազիայում կրկին սրվել են ներքաղաքական հակասությունները։ Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով Աբխազիայի բողոքի ցույցերը: «Ընդդիմադիր ուժերը, ցավոք, հնարավոր չհամարեցին քաղաքակիրթ, փոխադարձ հարգալից երկխոսության միջոցով լուծել երկրի օրինական իշխանությունների հետ տարաձայնությունները և դուրս եկան իրավական շրջանակներից՝ հրահրելով հակամարտության սրում»,- ասվում է ԱԳՆ կայքի մեկնաբանության մեջ։

Զախարովան Աբխազիայում ստեղծված իրավիճակը անվանել է ճգնաժամային՝ նշելով, որ դա կդանդաղեցնի հանրապետության զարգացումը և չի օգնի օտարերկրյա ներդրողների ներգրավմանը։ Նա նաև կոչ արեց խստորեն պահպանել օրենքը։

Ռուսաստանը չի միջամտում Աբխազիայում տեղի ունեցող գործընթացներին, սակայն ակնկալում է, որ ճգնաժամը կլուծվի խաղաղ ճանապարհով։ Բացի այդ, ԱԳՆ-ն խորհուրդ է տալիս ռուսաստանցիներին չայցելել հանրապետություն ճգնաժամի ժամանակ, իսկ այնտեղ գտնվողները պետք է զգույշ լինեն և չմոտենան անկարգությունների վայրերին։

Իսկ ահա ցուցարարները պնդում են, որ իրենց գործողություններն ուղղված չեն Ռուսաստանի հետ հարաբերությունների դեմ։ Բայց այն, որ Աբխազիայի այս վիճակը չի կարող արտաքին հետք չունենա, վերլուծական դաշտի գերիշխող մոտեցում է: Առաջին պլանում է վարկածը, որ այս ամենը կազմակերպվել է Թուրքիայի կողմից: