«ՄՐՑԱՎԱՐՆԵՐԸ ՀԱՂԹԱՆԱԿՍ ԳՈՂԱՑԱՆ ՈՒ ՆՎԻՐԵՑԻՆ ԱԴՐԲԵՋԱՆՑԻ ԸՄԲԻՇԻՆ». ՀՈՒՆԱՀՌՈՄԵԱԿԱՆ ՈՃԻ ԸՄԲԻՇ, Մ-17 ՏԱՐԵԿԱՆՆԵՐԻ ԵՎՐՈՊԱՅԻ ՓՈԽՉԵՄՊԻՈՆ, ՄԻՋԱԶԳԱՅԻՆ ՄՐՑԱՇԱՐԻ ՀԱՂԹՈՂ ԱԼԵՔՍ ՄԱՐԳԱՐՅԱՆ

Iravunk. com -ի մարզական թղթակիցը կապ է հաստատել ու բացառիկ զրույց ունեցել հունահռոմեական ոճի ըմբշամարտիկ, Մ-17 տարեկանների Եվրոպայի փոխչեմպիոն, միջազգային մրցաշարի հաղթող ԱԼԵՔՍ ՄԱՐԳԱՐՅԱՆԻ հետ։

- Ողջույն, Ալեքս ։Որ տարիքից սկսեցիր զբաղվել սպորտով հասցնելով պատանի հասակում նման նշանակալից հաջողության հասնել։

- 11 տարեկանից եմ սկսել պարապել հունահռոմեական ոճի ըմբշամարտով։ Հասցրել եմ մասնակցել մի շարք միջազգային մրցաշարերի, հաղթել, դարձել նաև արծաթե մեդալակիր։ Այս տարվա Եվրոպայի Մ-17 տարեկանների առաջնությանը նվաճել եմ արծաթե մեդալ։ Հանդես եմ եկել 60 կգ քաշային կարգում։ Մրցակիցներս համարյա բոլորն էլ տիտղոսակիր մարզիկներ էին։ Մեկնարկում բացարձակ առավելությամբ 10։0 հաշվով հաղթեցի Ալբանիայի ներկայացուցչին, ապա կրկին 10։0 հաշվով պարտության մատնեցի հունգարացի ըմբիշին, երրորդ գոտեմարտում կրկին բացարձակ առավելությամբ 10։0 հաշվով հաղթեցի վրացի մրցակցիս, կիսաեզրափակչում հաղթեցի Ուկրաինայի ներկայացուցչին 14։9 հաշվով։ Իսկ ահա եզրափակչում, ցավոք մրցավարները անարդար գտնվեցին ու հաղթանակս գողացան շնորհելով ադրբեջանցի ըմբիշին։ Ես բացահայտ հաղթել էի նրան 10։0 հաշվով, բայց 9։4 հաշվեցին ի օգուտ ադրբեջանցու և այդպես ինձ չտվեցին հաղթանակը։ Սակայն, ես չպիտի կոտրվեմ, այլ պիտի առաջ գնամ ու պայքարեմ ոսկե մեդալի համար։ Այժմ պատրաստվում եմ նոյեմբերի 1-ին ՌԴ-ում կայանալիք միջազգային մրցաշարին, այստեղ արդեն հանդես եմ գալու երիտասարդների կազմում, կլինի նաև քաշային կարգի փոփոխություն, նախկին 60-ի փոխարեն, հանդես կգամ 63 կգ քաշային կարգում։

- Ալեքս, շատ հետաքրքիր է, հարազատներիդ մեջ կան արդյոք մարզիկներ։ - Իհարկե, եղբայրս Վազգենը, ևս ըմբիշ է, ինձանից փոքր է, մինչև 15 տարեկանների Եվրոպայի չեմպիոն է։ Երազանքս է նվաճել Օլիմպիական խաղերի ոսկե մեդալը։

Անձնական մարզիչս Հարություն Հովհաննիսյանն է։ Առիթից օգտվելով, ուզում եմ շնորհավորել Ձեր թերթի «Իրավունքի» հիմնադրման հոբելյանական 35-ամյակը, մաղթում եմ անխափան գործունեություն, ամենայն բարիք, թող միշտ պտտվի Ձեր թերթի «անիվը», ու երբեք այն կանգ չառնի։ Իսկապես, շատ մեծ գործ եք կատարում, մենք մարզիկներս, շատ ունենք լուսաբանման կարիք ու դա մեզ շատ է ոգևորում, որպեսզի կարողանանք հասնել մեծ հաջողությունների, նվաճումների։ Ձեր թերթի շնորհիվ ողջ ազգը, հայ ժողովուրդը տեղեկանում է մեր գրանցած նվաճումների մասին։ Շատ լավ է, որ այս համացանցային դարում մեր երկրում կան նաև տպագիր թերթեր, ինչի կարիքը իրոք շատ է զգացվում։ Իսկ ահա Ալեքսի անձնական մարզիչը ՀԱՐՈՒԹՅՈՒՆ ՀՈՎՀԱՆՆԻՍՅԱՆԸ, մեզ հետ հանդիպման ժամանակ այսպես բնութագրեց իր սանին.

- «Ալեքսը շատ աշխատասեր, նպատակասլաց, հիանալի մարզիկ է, նրան շատ մեծ ապագա է սպասվում, ես շատ մեծ հույսեր եմ կապում նրա հետ։ Նա հաղթեց ադրբեջանցի ըմբիշին, ցավոք մրցավարները բացահայտ անարդար գտնվեցին ու Ալեքսի հաղթանակը նվիրեցին ադրբեջանցի մրցակցին։ Պիտի այնպես անենք, որ հետագա մրցաշարերի ժամանակ բացառվի մրցավարների նման կողմնակալ վերաբերմունքը, քանի որ դա կարող է կոտրել մարզիկին, նա կարող է հիասթափվել ։ Բայց նա շուտ հանձվող տեսակ չէ ու շատ հզոր կամքի ուժ ունի։ Այժմ պատրաստվում ենք նոյեմբերի 1֊ին կայանալիք միջազգային առաջնությանը, հուսով եմ ամեն ինչ լավ կստացվի»։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Այս թեմայով Մ-20 ԵԱ. ԾԱՆՐՈՐԴ ԱԼԵՔՍԱՆԴՐԱ ԳՐԻԳՈՐՅԱՆԸ ՆՎԱՃԵՑ ՉԵՄՊԻՈՆԻ ՏԻՏՂՈՍԸ ԵՐԻՏԱՍԱՐԴԱԿԱՆ ԵԱ. ԾԱՆՐՈՐԴ ԺՈՐԱ ԳՐԻԳՈՐՅԱՆԸ ՈՍԿԵ ՄԵԴԱԼԱԿԻՐ 4 ՀԱՅ ԲՌՆՑՔԱՄԱՐՏԻԿՆԵՐ ԻՐԵՆՑ ՆՈՐԱՄՈՒՏԸ ԿՆՇԵՆ ՊՐՈՖԵՍԻՈՆԱԼ ՌԻՆԳՈՒՄ ԱՅՍՕՐ ԳՅՈՒՄՐԵՑԻ ԱՆՎԱՆԻ ԾԱՆՐԱՄԱՐՏԻԿ, ՕԼԻՄՊԻԱԿԱՆ ԽԱՂԵՐԻ ԲՐՈՆԶԵ ՄԵԴԱԼԱԿԻՐ ԳՈՌ ՄԻՆԱՍՅԱՆԻ ԾՆՆԴՅԱՆ ՕՐՆ Է «ԵՐԲԵՔ ԳԼԽԱՎԵՐԵՎՈՒՄՍ ՉԷԻ ՊԱՀԵԼ 133 ԿԳ, ԲԱՅՑ ԿԱՐՈՂԱՑԱ». ԾԱՆՐԱՄԱՐՏԻ ՊԱՏԱՆԻՆԵՐԻ ԵՎՐՈՊԱՅԻ ԿՐԿՆԱԿԻ ՉԵՄՊԻՈՆ, ՌԵԿՈՐԴԱԿԻՐ, ԵՐԻՏԱՍԱՐԴՆԵՐԻ ԱՇԽԱՐՀԻ ՉԵՄՊԻՈՆ ԷՄՄԱ ՊՈՂՈՍՅԱՆ