Ավինյանն ունի արդեն այլ կոճակ սեղմողներ

«Ինչքան կարող ենք, այնքան կքերենք» կարգախոսով քաղաքապետարանում հայտնված որոշ «ընդիմադիր գործիքներ» փորձում են օգտվել իրենց բացառիկ կերպով ընձեռված դիրքից: Բանն այն է, որ Երեւանի ավագանին դեռ մեկ ամիս առաջ նիստում քննարկել եւ ընդունել է «Երեւան քաղաքի գլխավոր հատակագիծը հաստատելու մասին» որոշման նախագիծը։ 

Հիշեցնենք, որ 8 ամիս մշակված ու լրամշակված նախագիծը, առանց հանրային լսումների, հաստատվել է համապատասխան հանձնաժողովի կողմից ու ներկայացվել հաստատման։ Ավելի կոնկրետ` մայիսին եղել է ոչ մեծ քննարկում, որին մասնակցել է 11 անձ։ Առանց հարցուպատասխանի, նախագիծն անցել է հաջորդ փուլ։ Հիմա անցնենք ամենահետաքրքրականին:

Ըստ օդում կախված լուրերի` «Հանրային ձայն» խմբակցությունն այս նախագծին կողմ քվեարկելու  համար փորձել է գործարքի մեջ մտնել Տիգրան Ավինյանի հետ` նրա առջեւ դնելով երեք պայման՝ ազատ արձակել «Հանրային ձայն» կուսակցության նախագահ Արտակ Գալստյանի որդուն, ում մեղադրանք է առաջադրված թմրանյութեր պահելու, վաճառելու եւ օգտագործելու համար, ստանալ շինթույլտվություն եւ կլորիկ գումար:

Բնականաբար, Ավինյանը մերժել է այս պահանջները, քանի որ, ըստ մեզ հասած տեղեկության, Ավինյանն ունի արդեն այլ կոճակ սեղմողներ՝ Հայկ Մարությանի «Ազգային առաջընթաց» խմբակցությունից: Ի դեպ, Հայկ Մարությանի թիմը եւս բաժանվել է երկու թեւի: Ընդ որում՝ մեկ-երկու հոգու հանած, մնացածին ընդդիմադիր անվանելն այլեւս մեղք կլինի: Ահա թե ինչպես խաբեցին երեւանցուն ու տեղավորվեցին Երեւանի ավագանու հարմար աթոռներին:

Այսպիսով՝ ստացվեց այն, ինչ սպասելի էր. «Հանրային ձայն»-ը մնաց առանց անձրեւանոց եւ խայտառակվեց ավելի շատ, քան հնարավոր էր: Ի դեպ, կրկին մեզ հասած լուրերով՝  «Հանրային ձայն» խմբակցության անդամների հարաբերությունները կտրուկ վատացել են ՔՊ-ի հետ կոալիցիա կազմած «Հանրապետություն» խմբակցության անդամների հետ, մասնավորապես՝ խմբակցության ղեկավար Անի Խաչատրյանի:

Սեփ. լրատվություն