ՀԵՐՈՍԱԲԱՐ ԶՈՀՎԵԼ Է ՎԵՐԻՆ ՇՈՐԺԱՅՈՒՄ ԹԵԺ ՄԱՐՏԵՐԻ ԺԱՄԱՆԱԿ. ԱՆՄԱՀ ՀԵՐՈՍ ԱՐԹՈՒՐ ՄԽԻԹԱՐՅԱՆ

Սեպտեմբերի 21-ը, Գյումրեցի անմահ հերոս ԱՐԹՈՒՐ ԱՐՏՅՈՄԻ ՄԽԻԹԱՐՅԱՆԻ ծննդյան օրն է, կդառնար 22 տարեկան։ Iravunk. com -ի Շիրակի մարզի թղթակիցը ներկա է գտնվել։ Անմահ հերոսին նվիրված խաչքարի մոտ, ապա Շիրակի պանթեոնում գտնվող հուշարձանին այցելեցին հարազատներ, ընկերներ, որդեկորույս ծնողներ, ծաղիկներ խոնարհեցին ու խնկարկեցին։ Մեզ հետ զրույցում, անմահ հերոսի եղբայրը ԱՐՍԵՆԸ, խորը ցավը սրտում նշեց.

- «Եղբայրս ծնվել է 2002 թվականին, Գյումրիում Անկախության օրը սեպտեմբերի 21-ին։ 2008-2017թթ.սովորել է Գյումրիի թիվ 24 դպրոցում, ավարտել բարձր առաջադիմությամբ։ 14 տարի զբաղվել է սպորտով, մասնավորապես հունահռոմեական ոճի ըմբշամարտով։ Սպորտից բացի, նա սիրում էր զբաղվել նաև երաժշտությամբ, դհոլ էր սիրում նվագել։ 2017֊2020թթ.,ուսումը շարունակեց Գյումրու թիվ 4 ուսումնարանում «Ռադիոմեխանիկա» բաժնում։ 2020֊ի Արցախյան 44֊օրյա ահաբեկչական պատերազմի ժամանակ, մասնակցել է կամավորական աշխատանքների։ Եղբայրս մեր տան ավագ զավակն էր, ունենք նաև կրտսեր քույր Անին։ Եղբայրս շատ կենսուրախ ու կյանքով լեցուն էր ։2021֊ի մարտի 10֊ին, զորակոչվել է Հայոց բանակ, ծառայությունը շարունակել է Վարդենիսի զորամասում։ 2022֊ի հունվարի 11֊ին, ժամը 15։00֊ի սահմաններում, Վարդենիսի Վերին Շորժայի դիրքերում, հակառակորդը խախտել էր հրադադարը։ Արթուրին, որպես 11 ամսվա զինծառայող, նահանջելու հրաման էին տվել, սակայն եղբայրս, 13 նորակոչիկներին հետ է ուղարկել բունկեռ ու զինակից ընկերոջ հետ մնացել դիրքերում։ 2022֊ի հունվարի 11֊ին, Վերին Շորժայի թեժ մարտերում հերոսաբար զոհվել է, ջահել կյանքը տալով հանուն սրբազան հայրենիքի» ։ Անմահ հերոս Արթուր Մխիթարյանը, հետմահու պարգևատրվել է «Մարտական ծառայության» մեդալով և «Մարտական դիրքերը անառիկ պահելու» պատվոգրով։

ՇՆՈՐՀԱՎՈՐ ԵՐԿՆԱՅԻՆ ԾՆՈՒՆԴԴ, ԱՆՄԱՀ ՀԵՐՈՍ ։ՔՈ ՍԽՐԱՆՔՆ ԱՆՄԱՀ Է, ՔՈ ԱՆՈՒՆԸ ՄԵՐ ՍՐՏԵՐՈՒՄ։ ՀԱՎԵՐԺ ՓԱՌՔ ՄԵՐ ԲՈԼՈՐ ԱՆՄԱՀ ՀԵՐՈՍՆԵՐԻՆ...

Պատրաստեց ՀՈՎՀԱՆՆԵՍ ՍԱՐԳՍՅԱՆԸ