«Մի բանով օգնեք՝ մարդ ա մի 2000 դրամ տվեք, ծաղիկ տնկենք»

Կրկին քաոս, որի գլխավոր դերակատարներն են քաղաքապետարանը, թաղապետարանն ու անհասկանալի գործառույթով համայնատիրությունը, որի լինելն այդպես էլ ոչ ոք չհասկացավ, չնկատեց (բացի գումար պահանջելուց) ու չկարեւորեց:

Դավիթաշեն համայնքի երկրորդ թաղամասի շքամուտքերում փակցրել են մի թղթե գրություն, որտեղ գրված է. «Բակի կանաչապատման, ծաղկապատման, բարեկարգման համար անհրաժեշտ է ամեն բնակարանից 2000-3000 դրամ: Բոլորի մասնակցությունը ցանկալի է»: Նշված է նաեւ հեռախոսահամար:

Այս հարցը պարզաբանելու համար «Իրավունք»-ը զրուցեց Երեւանի քաղաքապետարանի Կանաչապատում եւ շրջակա միջավայրի պահպանության ՀՈԱԿ-ի տնօրեն ԱՐՄԵՆ ԲԵԳՈՅԱՆԻ հետ, ով ներկայացված նկարը համարեց ոչ օրինական, սակայն նաեւ ասաց, որ եթե համայնատիրությունն է գրության հեղինակը, ու եթե բոլորը կողմ են, ապա՝ ինչո՞ւ ոչ:

«Մենք գումար չենք հատկացնում եւ, այսպես ասած, ո՞ւմ հատկացնենք: Եթե դիմում են մեզ՝ տնկանյութեր տրամադրելու համար, մենք այդ ժամանակ ուսումնասիրում ենք բակային հնարավորություները ու մեր հնարավորությունները հաշվի առնելով՝ տրամադրում ենք: Ուղղակի, մենք չգիտենք, թե համայնատիրությունն ինչ է ցանկացել անել, արդյո՞ք դիմել է թաղապետարան կամ մեզ դիմե՞լ է ու չի՞ ստացել օգնություն: Մեր մասով կասեմ, որ նման բան չի եղել: Ինչ վերաբերում է համայնատիրությանը, որը ձայներով քվեարկող մարմին է, պարզապես, իրավունքի տեսանկյունից, ինքը կարող է ինչ-որ նախաձեռնող լինել եւ փող հավաքել: Գիտեմ, որ բնակիչները կողմ են քվեարկում: Խնդիրը սրանում է: Ես ուղղակի իրավական տեսանկյունը նշեցի, բայց բազմաթիվ բակեր են եղել, որ դիմել են մեզ, եւ մենք օժանդակել ենք: Ինչ վերաբերում է մեզ, մենք հիմնականում հանրային օգտագործման տարածքներն ենք սպասարկում, իհարկե, այս պահին նաեւ բակային տարածքներ»,- իր խոսքում ասաց Բեգոյանը:

Ի՞նչ է ստացվում. եթե համայնատիրությունը դիմեր Կանաչապատում եւ շրջակա միջավայրի պահպանության ՀՈԱԿ-ի տնօրեն Արմեն Բեգոյանին, ապա գումար հավաքելու կարիք չէր ունենա: Այսինքն՝ հեշտ միջոց են սովորել՝ բնակիչներ ջան, փող տվեք, ձեր տարածքը կանաչապատենք: Հարց է առաջանում, որ ամեն ամիս բնակիչը գումար է մուծում համայնատիրությանը, ի՞նչի վրա են ծախսվում այդ գումարները: Երբ բնակչության մեծ մասը օրվա հացի փողը դժվարությամբ է վաստակում, բայց փորձում է ամեն տեսակի հարցերին իր գրպանից լուծում տալ, որպեսզի ապրի ավելի կանաչապատ եւ գեղեցիկ տարածքում, ապա որտե՞ղ են գրանցվում ընթացիկ ծախսերը, եւ ո՞վ է հաշվետու լինում այդ նույն բնակչին: Ի վերջո, վարչական շրջանն այդ աստիճան անճա՞ր է, որ իր տարածքը չի կարողանում կանաչապատել ու մնացել է բնակչի 2000 դրամի հույսին: Արդյո՞ք Դավիթաշեն համայնքի վարչական շրջանի պարտականությունների մեջ չէ մտնում նաեւ կանաչապատումը, կամ դրանք իրականացնելու նախաձեռնությունը:

Էլի խեղճ ժողովուրդ՝ ուզում ես շնչել՝ վճարիր: Հետաքրքիր է միայն Դավիթաշենի համայնքապետարա՞նն է այսքան «շուստրի», թե՞ նմանատիպ վարչական շրջաններ էլի կգտնվեն: Քաղաքապետարան, աուո՜ւ, տեղյա՞կ եք, թե ինչ է կատարվում վարչական շրջանում: Մարդկանցից կրկին գումար են հավաքում, որ կատարեն այն, ինչի համար ամեն ամիս բնակիչն արդեն վճարում է: Չէ, տեղյակ չե՞ք: Կներեք, որ շեղեցինք ձեզ, ձեր մանդատախլոցիից: Շարունակե՛ք մուրալ երեւանցուց, թե բա՝ մի բանով օգնեք, մարդ ա մի 2000 դրամ տվեք, ծաղիկ տնկենք: Ու մի բան էլ՝ «բոշեն փաշա չի դառնա»:

ՆԱՆԱ ՍԱՐԳՍՅԱՆ