Քաջարանցին արժանի է ամենալավին. քաղաքը նշում է հիմնադրման 66-ամյակը

Սյունիքի մարզի Քաջարան քաղաքում տոն է. Հայաստանի արդյունաբերական քաղաքն այսօր տոնեց 66-ամյակը: Oրը նշանավորվեց մի շարք միջոցառումներով, որոնց մասնակցում էին նաեւ Սյունիքի մարզային իշխանությունները, Սյունիքի համայնքների ղեկավարները, ԱԺ սյունեցի պատգամավորներ, ԻԻՀ հյուպատոսը, Սյունիքում «ԶՊՄԿ» ղեկավար կազմը՝ գլխավորությամբ տնօրեն Ռոման Խուդոլիի, եւ այլք:

Քաջարանի քաղաքապետ Մանվել Փարամազյանը նախ համայնքապետարանում ընդունեց հյուրերին, ապա պաշտոնյաներն այցելեցին արցախյան պատերազմներում զոհված ազատամարտիկների հուշահամալիր, ծաղիկներ խոնարհեցին հայրենիքի համար կյանքը զոհած քաջարանցի հայորդիների հիշատակին։

Բաբիկավան բնակավայրում առաջին անգամ բացվեց մանկական խաղահրապարակ, Քաջարան համայնքի Բակունց եւ Տերյան փողոցներում՝ ֆուտբոլի դաշտեր։ Այս ամենն իրականություն է դարձել սուբվենցիոն ծրագրով՝ կառավարություն-համայնք համաներդրմամբ եւ «ԶՊՄԿ»-ի ֆինանսավորմամբ։

Օրվան նվիրված հանդիսավոր նիստում քաջարանցիների տոնը շնորհավորեցին Սյունյաց թեմի առաջնորդական տեղապահ Հոգեշնորհ Տ. Մակար վարդապետ Հակոբյանը, մարզպետ Ռոբերտ Ղուկասյանը, «ԶՊՄԿ» ՓԲԸ գլխավոր տնօրեն Ռոման Խուդոլին, Քաջարան համայնքի ղեկավար Մանվել Փարամազյանը։

Քաղաքապետն իր ելույթում նշեց, որ քաջարանցիների համար հույժ կարեւոր տոն է՝ նշանավորելու արդյունաբերական քաղաքի պատմությունը եւ նրա բնակիչների անցած փառահեղ աշխատանքային ուղին, հիշելու եւ հաստատելու՝ ով ենք մենք, որտեղից ենք գալիս եւ ուր ենք գնում, խոնարհվելու մեր տոհմիկ նախնիների եւ հայրենիքի համար զոհված հերոսների հիշատակի առաջ, ամփոփելու այս տարիների ընթացքում մեր կատարած աշխատանքներն ու ձեռքբերումները, արժեւորելու աշխատավոր մարդու, հանքագործի հանապազօրյա սխրանքն ու վաստակը:

«Քաջարանցին արժանի է ամենալավին։ Եվ այսօր մենք ընդլայնում ենք մեր արտաքին կապերը, որպեսզի ավելի արդյունավետ եւ տեսանելի դարձնենք մեր քաղաքի զարգացման ուղին։ Եվ այդ ուղղությամբ մեր այս տարվա ձեռքբերումներից էր՝ Չինաստանի Ժողովրդական Հանրապետության Հեյլունծիյան նահանգի Հարբին քաղաքում, մեր եւ Հարբին քաղաքի ժողովրդական կառավարության միջեւ ստորագրված փոխըմբռնման եւ համագործակցության մասին հուշագիրը, ինչը առաջիկայում ավելի տեսանելի եւ գործնական կդառնա՝ ամենատարբեր ոլորտների համագործակցությամբ։ Արտաքին հարաբերությունների ձեւավորման գործընթացում մենք այլ նախադրյալներ նույնպես ունենք, որոնք գործնական կդառնան առաջիկայում»,-ասաց Փարամազյանը։

Հանդիսավոր նիստի ավարտից հետո տեղի ունեցավ պարգեւատրումներ։ Երեկոն Քաջարանում շարունակվեց մշակութային միջոցառումներով ու հյուրասիրությամբ։ Տոնական օրն ամփոփվելու է Արկադի Դումիկյանի համերգով։

Այս թեմայով Գյումրիի քաղաքապետը հրաժարական է տվել Մ-23 ԱԱ. ՄԱՆՎԵԼ ԽՆՁՐՑՅԱՆԸ ՀԱՂԹԵՑ ԱԴՐԲԵՋԱՆՑԻ ՈՒ ԹՈՒՐՔ ՄՐՑԱԿԻՑՆԵՐԻՆ Մարտակերտի քաղաքապետ Միշա Գյուրջյանն արդարացվել է Միայն դիտեք՝ երևանցիներն ինչպես են պարում «Երևան» երգի ներքո Մանրամասներ՝ Գյումրու գարեջրի սեփականատիրոջ ձերբակալությունից