Ամեն անգամ Ազնավուրի երգերը լսելիս հուզվում եմ. Զայցեւի վերջին զրույցը «Իրավունքին»
ՄշակութայինՄահացել է ՌԴ նորաձեւության տան նախագահ, դեռեւս անցյալ դարի 70-ական թվականներից Ռուսաստանում նորաձեւության մեջ ուրույն ռոմանտիկ ոճի, դասականության եւ էլեգանտության դպրոցի հիմնադիր 85-ամյա ՎՅԱՉԵՍԼԱՎ ԶԱՅՑԵՎԸ:
Լեգենդար կուտուրյեն դեռեւս 2017 թվականին այցելել էր Հայաստան եւ ներկայացրել իր «Ոսկե դար» հավաքածուն: Նա հիացած էր Երեւանով, հատկապես համարում էր, որ քաղաքը հոյակապ ճարտարապետություն ունի եւ հետաքրքիր եկեղեցիներ, իսկ մարդիկ, ուղղակի հրաշալի են: «Իրավունքն» առիթ ունեցել է զրուցելու նրա հետ: Այն դարձավ մեր առաջին ու վերջին զրույցը, որը ներկայացնում ենք մեր ընթերցողների դատին:
- Վյաչեսլավ Մեխայլովիչ, որքանով հասցրել եք հետեւել, ի՞նչ կասեք հայաստանյան նորաձեւության մասին:
- Հիասքանչ նորաձեություն ունեք: Ես օդանավակայանում թերթել եմ ձեր ամսագրերը եւ տեսել եմ ձեր մոդելներին, նրանք ինձ շատ դուր եկան:
- Ձեր հավաքածուն ցուցադրող մոդելների շարքում կային նաեւ հայ մոդելների: Ինչպե՞ս գնահատեք նրանց աշխատանքը:
- Հրաշալի էին, նրանք հիանալի էին անում իրենց աշխատանքը, ամեն ինչ շատ գեղեցիկ էր ստացվել:
- Նկատեցինք, որ Ձեր հավաքածուներում Դուք օգտագործում եք ազգային էլեմենտներ: Կարելի՞ է համարել, որ ազգայինը կրկին նորաձեւ է:
- Լավ դիզայները նա չէ, որը կարողանում է ճիշտ կրկնօրինակել ազգայինը, այլ նա է, որը կարողանում է հաջող այն կիրառել նորաձեւության մեջ: Որովհետեւ, ուղղակի, կրկնօրինակումը ձանձրալի է եւ անհետաքրքիր: Ազգային կոստյումներից լավը չկա, պարզապես, այն հորինելն է բարդ: Այն այսօր պետք է լինի նորաձեւության հիմքը, իսկ լուծումները բոլորովին այլ պետք է լինեն: Կարեւոր է կտորների ընտրությունը, որոնք պետք է ընդգծեն դիզայների ինքնուրույնությունը:
- ժամանակին շատ հայ դիզայներներ են Ձեզ մոտ ուսանել, հետաքրքիր է՝ այսօր ե՞ւս ունեք հայ սաներ…
- Տարօրինակ է, բայց հիմա ոչ մեկը չկա, թեպետ, իսկապես, արտակարգ դիզայներներ ունեք:
- Որպես տարիների մեծ փորձ ունեցող պրոֆեսիոնալ դիզայներ, ի՞նչ խորհուրդ կտաք հայուհիներին:
- Առաջին հերթին, որպեսզի լինեք նորաձեւ եւ գեղեցիկ, հետեւեք ձեր կառուցվածքին: Եվ թեպետ ձեր երկրում հրաշալի ուտելիքներ կան եւ դժվար է ժամանակին կանգ առնել, ինչում ինքս էլ եմ համոզվել, բայց քիչ կերեք: Նորաձեւությունը, որպես կանոն, կենտրոնացված է բարեկազմ արտաքին ունեցողների վրա: Եվ երկրորդ՝ երբ տանից դուրս եք գալիս, տեղը տեղին շպարվում եք, բայց գեղեցիկ է, երբ թեթեւ է շպարը: Ընտրեք նուրբ գույների շրթներկ: Ինչ վերաբերում է մազերին, պետք է լինի կա՛մ կարճ կտրվածք, կա՛մ հավաք սանրվածք: Օրինակ, ես իմ մոդելների դեմքերի հետ, սովորաբար, ոչինչ չեմ անում: Կինը պետք է նուրբ լինի նաեւ իր դիմահարդարմամբ:
- Իսկ ի՞նչ խորհուրդ կտաք հագնել հայուհիներին, որպեսզի ե՛ւ նորաձեւ լինեն, ե՛ւ գեղեցիկ:
- Դասական կոստյումներ եւ զգեստներ՝ զուգագուլպաներով, որոնք պետք է լինեն կա՛մ հենց զգեստի, կա՛մ պիջակի գույնի: Մերկությունը չի գեղեցկացնում կնոջը, այլ զուգագուլպաներն, ընդհակառակը՝ զարդարում է նրան: Եթե նկատեցիք, իմ հավաքածուներում մերկություն չեք գտնի: Շատ գեղեցիկ են նաեւ ուռուցիկ շրջազգեստները: Իսկ երեկոյան զգեստների համար, ես օրինակ վերցրեցի հնդական սարիների կտորներ եւ ռուսական թեմատիկայով գեղեցիկ գլխաշորեր պատրաստեցի:
ՀՐԱՆՏ ՍԱՐԱՖՅԱՆ
Հ.Գ.- Ի դեպ, Վ. Զայցեւի հավաքածուի երեւանյան ցուցադրության ժամանակ հնչում էին Շառլ Ազնավուրի երգերը: Այս մասին հարցից լեգենդար կուտուրյեն կրկին հուզվեց՝ ասելով, որ նրա ձայնն, ուղղակի, կախարդական է եւ ամեն անգամ Ազնավուրի երգերը լսելիս հուզվում է: