Ամանորյա գներին սպասելիս

Ամանորին մնացել են հաշված օրեր: Չնայած այն հայերի ամենասիրելի տոներից մեկն է, այնուամենայնիվ այս օրերին նրանց այլ հարց է մտահոգում` ո՞ր ապրանքները կթանկանան, ինչքա՞ն եւ այլն: Սպառողների մտահոգություններն ունեն հիմք, քանի որ ամեն տարի շուկայում տեղի են ունենում ահռելի չափերի հասնող անտրամաբանական թանկացումներ:

«Սպառողների խորհրդատվության կենտրոն» հասարակական կազմակերպության նախագահ Կարեն Չիլինգարյանի խոսքով` նախորդ տարիների համեմատությամբ, այս տարի ապրանքների թանկացումը գոնե այս պահին զգալի չէ, նույնիսկ այդ մասին սպառողներն են բարձրաձայնում. «Գրեթե բոլոր սուպերմարկետներում չկա թանկացում: Օրինակ, չի նկատվում մսեղենի թանկացում: Հիմանականում թանկանում է ընդեղենը, եւ չի բացառվում, որ առաջիկայում մի քանի դրամով էլ թանկանա: Բացի այդ, կթանկանա նաեւ միրգ-բանաջարեղենը, բայց ոչ այնքանով, որքանով նախորդ տարիներին»:

Այսօր շուկայի ուսումնասիրությունը ցույց է տվել, որ լայն սպառման ապրանքների թանկացումը չի կարող մեծ չափերի հասնել, քանի որ սպառողների գնողունակությունը ընկել է, այդ պատճառով էլ յուրաքանչյուր տնտեսվարող մտածում է իր ապրանքի իրացման մասին. «Հուսով ենք, որ առաջիկա երկու շաբաթների ընթացքում սպառողական շուկայում գների ահռելի թանկացում չի նկատվի»,- հավելեց Կարեն Չիլինգարյանը:

Այս օրերին որոշակի թանկացումներ նկատվում են մանկական ապրանքների խանութներում: «Սոցիոմետր» սոցիոլոգիական կենտրոնի ղեկավար, սոցիոլոգ Ահարոն Ադիբեկյանը փաստեց, որ Հայաստանում գործում են երեք տիպի խանութներ` մեծ` բարձրորակ ապրանքների, փոքր ու միջին. «Հայաստանում շուկան դեռեւս լրիվ ձեւավորված չէ, հստակություն չկա: Օրինակ, Եվրոպայում, տոների հետ կապված, ապրանքների գները կտրուկ չեն բարձրացնում. դրանց վաճաքի քանակի ավելացումն ապահովում է մեծ եկամուտներ, իսկ մեզանում այդ ավանդույթը դեռ չկա: Եկամուտ ապահովելու համար հայ տնտեսվարողները հատկապես տոն օրերին բարձրացնում են ապրանքների գները»:

Ինչ վերաբերում է պարենին, ապա սոցիոլոգը եւս նկատեց, որ Ամանորին հիմնականում կթանկանա ընդեղենը, տարբեր տեսակի չրերը: Իսկ խմիչքի գները նույնը կմնան: Ա. Ադիբեկյանը եւս համոզմունք հայտնեց, որ այս տարի տոներին ընդառաջ նախորդ տարիների նման ապրանքների գների բարձրացումը զգալի չի լինի: 

Սպառողական շուկայի վերաբերյալ Տնտեսական մրցակցության պաշտպանության պետական հանձնաժողովի ուսումնասիրությունները կներկայացնենք առաջիկայում:

ԶՎԱՐԹ ԽԱՉԱՏՐՅԱՆ