«Գրական տապան 2016-ն»ավարտեց նավարկությունը.փառատոնի հյուրերը տպավորված են մեկնում Հայաստանից

«Գրական տապան 2016» փառատոնն ավարտեց իր նավարկությունը: Սեպտեմբերի 27-ին Սպուտնիկ Արմենիա մամուլի կենտրոնում տեղի ունեցավ փառատոնի ամփոփիչ ասուլիսը, որի ընթացքում միջոցառման կազմակերպիչները ներկայացրին կատարած աշխատանքը, իսկ օտարերկրյա մասնակիցները խոսեցին տպավորությունների մասին: «Գրական տապանի» համահիմնադիր, համակարգող եւ մշակութային տնօրեն Դավիթ Մաթեւոսյանը հիշեցրեց, որ փառատոնն այս տարի անցկացվում էր «Արդյոք ազատն անկա ՞խ է, արդյոք անկախն ազա՞տ է: Անձ: Հասարակություն: Ազգ: Աշխարհ» (Is the Free independent, is the Independent free? Person. Society. Nation. World.) խորագրի ներքո: «Կարգախոսը հնարավորություն տվեց ունենալ մի շարք զրույցներ, քննարկումներ: Ազատության գաղափարը գերակշռում է մշակույթի, գրականության մեջ որպես հիմնական թեմա. անկախությունն առավել եւս: Եվ պատահական չէր փառատոնի կարգախոսի ձևակերպումը»,-շեշտեց Դավիթ Մաթեւոսյանը: «Գրական տապանի» մասնակից Կալինա Իզաբելա Զիոլան (Լեհաստան) շնորհակալություն հայտնեց կազմակերպիչներին հետաքրքիր փառատոնի համար: «Շատ ուրախ եմ, որ մասնակցեցի, Հայաստանում այցելել եմ տարբեր վայրեր, ծանոթացել եմ հետաքրքիր մարդկանց հետ: Այստեղ շատ ընկերներ գտա, մոտիկից ճանաչեցի հայ գրողներին: Շատ հաճելի էր ծանոթանալ այլ երկրների մշակույթներին: Ւնձ հետ Լեհաստան կտանեմ հիշողություններ ձեր երկրի եւ իմ տեսածի մասին»,-ընդգծեց Կալինա Իզաբելա Զիոլան` հավելելով, որ «Գրական տապանը» կարող է միջազգային փառատոնի կազմակերպման լավագույն օրինակներից մեկը լինել: «Գրական տապանի» մասնակից Բաշիր Սախավարզը (Միացյալ Թագավորություն) իր խոսքում նշեց, որ մեր երկրում հրաշալի վերաբերմունքի է արժանացել: «Որոշ արձակագիրների, բանաստեղծների լսեցի եւ կարող եմ ասել, որ գրականության որակը շատ բարձր է այս երկրում»,-ասաց նա` հավելելով, որ տպավորված է նաեւ հայկական մշակույթով: Բաշիր Սախավարզը խոստացավ, որ Հայաստան այցի մասին ճամփորդական ակնարկ կպատրաստի, որը տեղ կգտնի «Պանորամա» ամսագրում: Անտոնիո Ֆիանն (Ավստրիա) էլ շեշտեց, որ փառատոնն առանձնահատուկ էր նրա համար, քանի որ մեր երկրում հանդիպել է բազմաթիվ հայ եւ օտարերկրյա գրողների: Հիշեցնենք, որ գրականության ոլորտի տարբեր ներկայացուցիչներ աշխարհի տասնյակ երկրներից Հայաստանում սեպտեմբերի 18-28-ը մասնակցում էին «Գրական տապան 2016» փառատոնին: Արդեն 8-րդ անգամ իրականացվող գրական տոնը կազմակերպվում է 2001 թվականից Արտասահմանյաներկրների հետ մշակութային համագործակցության հայկական ՀԿ-ի կողմից` ՀՀ մշակույթի նախարարության աջակցությամբ եւ մի շարք գրական կազմակերպությունների, այդ թվում` Բեռլինի Լիտերատուրվերկշտատ, Ջենովայի պոեզիայի փառատոնի գործընկերությամբ: «Գրական տապանի» շրջանակում անցկացվում են գրքերի շնորհանդեսներ, քննարկումներ, դասախոսություններ, ընթերցումներ, վարպետության դասեր ու մի շարքայլ միջոցառումներ: Փառատոնին մասնակցում էին գրական ոլորտի ներկայացուցիչներ Անտոնիո Ֆիանը (Ավստրիա), Էլիզաբեթ Ֆիանը (Ավստրիա), Գուրամ Օդիշարիան (Վրաստան), Կլաուդիո Պոցանին (Իտալիա), Ֆահրեդին Շեհուն (Կոսովո), Կալինա Իզաբելա Զիոլան (Լեհաստան), Դարիուս Թոմաս Լեբիոդան (Լեհաստան), Վադիմ Մեսյացը (Ռուսաստան), Լերա Մանովիչը (Ռուսաստան), Ռոդոլֆո Հասլերը (Իսպանիա), Բաշիր Սակհավարզը (Միացյալ Թագավորություն), Կարստեն Շտայնմեցը (Գերմանիա), ինչպես նաև բազմաթիվ հայ գրողներ: